लोकसत्ता टीम
नागपूर: उपराजधानीतील विविध भागात रस्त्याच्या कडेला ठेवलेल्या प्रवासी वाहनांविरोधात प्रादेशिक परिवहन कार्यालय (आरटीओ) आणि शहर वाहतूक पोलिसांनी एकत्र कारवाई सुरू केली आहे. १ हजार २०६ वाहनांवर कारवाई करण्यात आली.
पोलीस आयुक्त अमितेश कुमार यांनी या वाहनांवर कारवाईबाबत प्रादेशिक परिवहन कार्यालय आणि शहर वाहतूक पोलिसांना सूचना केली. त्यावरून वाहतूक पोलिसांसह शहर आरटीओ आणि पूर्व नागपूर उपप्रादेशिक परिवहन कार्यालयांनी वेगवेगळे पथक बसवून एकाच वेळी अमरावती मार्ग, वाडी, पारडी, बर्डी, विमानतळ या मार्गांवर कारवाई केली. शहर आरटीओकडून एकूण ३२ वाहनांवर कारवाई करून त्यातील ५ वाहने ताब्यात घेण्यात आली.
आणखी वाचा- अकरा एसटी चालक-वाहकांचे निलंबन तीनच दिवसात रद्द; महामंडळाला उपरती की आंदोलनाचा धसका?
पूर्व नागपूर आरटीओ कार्यालयाने ३५ वाहनांवर कारवाई करून १४ वाहने ताब्यात घेतली. शहर वाहतूक पोलिसांनी २४ मार्चला ७१४ वाहनांवर कारवाई करून त्यातील १४४ ताब्यात घेतली. २५ मार्चला ४२५ वाहनांवर कारवाई करून १६८ वाहने ताब्यात घेतली. वाहतूक पोलिसांनी २४ मार्चला कारवाई केलेल्या वाहन धारकांकडून १ लाख ४० हजार २०० रुपये तर २५ मार्चला वाहन धारकांकडून ३ लाख ३६ हजार ५०० रुपयांचा दंड वसूल केला. वाहतूक पोलिसांच्या वतीने कारवाईचे नेतृत्व वाहतूक पोलीस उपआयुक्त चेतना तिडके तर आरटीओच्या वतीने प्रादेशिक परिवहन अधिकारी रवीद्र भुयार यांनी केले.
वाहतूक पोलिसांवी कारवाई
संवर्ग कारवाई ताब्यात
ऑटोरिक्षा ६६३ २०२
ई- रिक्षा १०३ ०६७
जड वाहने ३७३ ०४३
एकूण १,१३९ ३१२
