नागपूर : पहलगाम येथील अतिरेकी हल्ल्याने देशभरात तणावाचे वातावरण असतानाच नागपूरजवळील कामठी येथे काश्मिरी विद्यार्थ्याला मारहाण करण्यात आली. या प्रकरणाची चित्रफीत काश्मीरमधून ‘एक्स’वर प्रसिद्ध झाल्यानंतर पोलीस प्रशासनात खळबळ उडाली.मिळालेल्या माहितीनुसार, कामठी येथील श्रीमती किशोरीताई भोयर कॉलेज ऑफ फॉर्मसीत शिक्षण घेणारे पीयूष व मोहम्मद वसीम हे विद्यार्थी रविवारी सायंकाळी बाजारात गेले होते. परत येताना पीयूष लघुशंकेला गेला तर रस्त्यावर उभ्या असलेल्या वसीमवर काही युवकांनी संशय घेत विचारपूस सुरू केली.
समाधानकारक उत्तर न मिळाल्याने काही तरुणांनी त्याला मारहाण केली. आवाज ऐकून धावून आलेल्या पीयूषने त्याला वाचवण्याचा प्रयत्न केला व कॉलेजचे विद्यार्थी असल्याचे स्पष्ट केले. या विद्यार्थ्यांनी ओळख पटवण्यासाठी हॉस्टेलमधील मित्रांना बोलावले. त्यानंतरच जमावाने त्यांना सोडले. या घटनेची चित्रफीत काश्मीरमधील विद्यार्थ्यांच्या संघटनेने ‘एक्स’वर टाकल्याने खळबळ उडाली. या प्रकरणी पोलिसांनी विद्यार्थ्यांशी संपर्क साधून चौकशी केली. मात्र, पीडित विद्यार्थ्याने तक्रार दाखल केली नाही. ‘ही घटना संशयातून घडली असून कोणतीही हेतूपुरस्सर मारहाण झाली नाही’, असे परिमंडळ क्रमांक ५ चे पोलीस उपायुक्त निकेतन कदम यांनी स्पष्ट केले.
