बुलढाणा : राष्ट्रमाता जिजाऊ, पुण्यश्लोक अहिल्यादेवी होळकर व छत्रपती संभाजी महाराज यांचे नाव राष्ट्रपुरुषांच्या यादीत समाविष्ट करण्यात यावे, अशी मागणी आमदार संजय गायकवाड यांनी केली होती. त्यांचे प्रयत्न व पाठपुरावा यशस्वी ठरला असून लवकरच या यादीत या तिघांची नावे समाविष्ट होणार असल्याची माहिती आहे.
स्वराज्य जननी जिजामाता यांनी छत्रपती शिवराय व संभाजी महाराजांना घडवले. पुण्यश्लोक अहिल्यादेवी होळकर यांनी देखील स्वराज्याच्या विस्तारात मोठा हातभार लावत अनेक वर्षे एक आदर्श राज्य सांभाळले. छत्रपती संभाजी महाराज यांनी आपल्या परक्रमाच्या जोरावर अल्पकाळातच मराठा साम्राज्याचा विस्तार, संरक्षण केले व बलाढ्य शत्रूंशी मुकाबला करीत प्राणाचे बलिदान दिले. मात्र, या महामानवांची नावे राष्ट्रपुरुष यादीत नव्हती. हा अधिकार राज्याला नसल्याने मुख्यमंत्र्यांनी स्वत: लक्ष देऊन ही मागणी केंद्र सरकारकडे रेटली व सतत पाठपुरावा केला. या प्रयत्नाला यश मिळाले असून ही यादी १८ ऑक्टोबर रोजी राज्य शासनाचे उपसचिव जे.जे. वळवी यांच्या स्वाक्षरीने केंद्र शासनाच्या अंतिम मंजुरीसाठी पाठवण्यात आली आहे. लवकरच ही नावे राष्ट्रपुरुष, थोर व्यक्तींच्या यादीत समावेश केली जाणार असल्याचे गायकवाड यांनी स्पष्ट केले.
