लोकसत्ता टीम
अकोला : नामांकित खासगी रेस्टॉरंटमध्ये मराठी गाणे न लावण्यावरून अकोला महाराष्ट्र नवनिर्माण सेनेने आक्रमक भूमिका घेतली. व्यवस्थापनाला जाब विचारून आगामी काळात मराठी गाणे न वाजवल्यास तीव्र आंदोलन छेडण्याचा इशारा देण्यात आला.
शहरातील गोरक्षण मार्गावरील ‘केएफसी’ व ‘पिझ्झा हट’ येथे मराठी गाणी वाजवल्या जात नाहीत. त्यामुळे महाराष्ट्र नवनिर्माण सेनेच्या पदाधिकाऱ्यांनी जाब विचारला. त्यावर हे इंग्रजी गाणे वैयक्तिक नभोवाणीवरून वाजवले जातात, असे उत्तर स्थानिक कर्मचाऱ्यांनी दिले. त्यावर मनसे पदाधिकाऱ्यांचे समाधान न झाल्याने त्यांनी व्यवस्थापकाशी दुरध्वनीवरून संपर्क साधला. त्यावर वरिष्ठ व्यवस्थापनाने काही दिवसांचा वेळ मागितला व त्यांना ‘ईमेल’द्वारे कळवण्यात आले.
मराठी गाणे वाजणार नाही तोपर्यंत सुरू असलेले इतर गाणे बंद करावे, अशी आग्रही भूमिका मनसेने घेतली. त्यानंतर दोन दिवसापासून संबंधित रेस्टॉरंटमध्ये गाणे बंद आहे. लवकरात लवकर मराठी गाणी न वाजवल्यास मनसे आक्रमक आंदोलन करणार असल्याचा इशारा व्यवस्थापकला देण्यात आला. यावेळी जिल्हाध्यक्ष पंकज साबळे, शहर संघटक अरविंद शुक्ला, जिल्हा सहसचिव मोहन मते, शहर उपाध्यक्ष सोनू अवचार व आकाश शेजे उपस्थित होते.
