लोकसत्ता टीम
अमरावती : लोकसभा निवडणुकीच्या दुसऱ्या टप्प्यात अमरावती लोकसभा मतदारसंघात आज सकाळी मतदानाला सुरुवात झाली. मतदानासोबतच आज मोठ्या संख्येने लग्नाचे मुहूर्त देखील आहेत. अमरावतीच्या वडरपुरा परिसरातील नवरदेव लग्नासाठी वऱ्हाड घेऊन वर्धा येथे जाण्यापूर्वी मतदान केंद्रावर पोहोचून त्याने मतदानाचा हक्क बजावला.
शहरातील वडरपुरा परिसरातील आकाश पवार या युवकाचे आज वर्धा इथे लग्न आहे. लग्नाआधी मतदानाचे कर्तव्य बजावण्यासाठी आकाश पवार आपल्या आई-वडील तसेच वऱ्हाडासह वडरपुरा येथील महापालिकेच्या शाळेतील मतदान केंद्रावर मतदानाचा हक्क बजावण्यासाठी आला.
आणखी वाचा-उपराजधानीतून तीन वर्षांत ११९५ अल्पवयीन मुली बेपत्ता
वर्धा येथेही आज मतदानाचा दिवस आहे. नवरी देखील वर्धेत आधी मतदानाचा हक्क बजावणार आहे. त्यानंतर सकाळी ११ वाजता आमचे लग्न होणार असल्याचे आकाश पवार याने सांगितले.
ग्रामीण भागात उत्‍साहाला मतदानास सुरूवात झाली. जिल्‍ह्यात काल रात्री अवकाळी पाऊस झाला. प्रादेशिक हवामान विभागाने पावसाची शक्‍यता वर्तवली आहे. अनेक ठिकाणी ढगाळ वातावरण आहे. दुपारनंतर तापमान वाढण्‍याची शक्‍यता आहे. त्‍यामुळे सकाळपासूनच मतदान केंद्रांवर मतदारांच्‍या रांगा लागलेल्‍या दिसत आहेत. सध्‍या शेतीच्‍या मशागतीची कामे सुरू असल्‍याने शेतकरी, शेतमजूर सकाळीच मतदान केंद्रांवर पोहचून मतदानाची लगबग दिसत आहे.
