नागपूर: आर्थिक व्यवहारावरून उद्भवलेल्या वादात तिघांनी मैत्रिणीच्या घरात लपून बसलेल्या एका युवकावर प्राणघातक हल्ला केला. मध्यस्थीसाठी गेलेल्या मैत्रिणीलाही जखमी केले. ही घटना जरीपटका पोलीस ठाण्याअंतर्गत घडली. रजत पाटील (२४) रा. कपिलनगर आणि सोनाली उईके (२२) रा. इंदोरा अशी जखमींची नावे आहेत.
या प्रकरणी रजतची आई माला पाटील (५०) यांच्या तक्रारीवरून पोलिसांनी आरोपी विरूध्द गुन्हा नोंदविला. उद्देश डोंगरे (२४) रा. इंदोरा, सागर गजभिये आणि विक्की उर्फ मंगल इंदूरकर दोन्ही रा. मॉडेल टाउन अशी अटकेतील आरोपींची नावे आहेत.
हेही वाचा… सुमीत ठाकूरच्या टोळीच्या सदस्याला मुंबईतून अटक
रजतची आरोपींची चांगली मैत्री होती. काही दिवसांपूर्वी उद्देशला एका कामाचे ७ हजार रुपये मिळाले. मात्र, त्याच्याकडे ऑनलाईन पेमेंटची व्यवस्था नसल्याने त्याने रजतला त्याच्या खात्यात पैसे मागवायला सांगितले. परंतु रजतकडे सुध्दा यूपीआय पेमेंट सुविधा नव्हती. त्याने मैत्रिण सोनालीच्या नंबरवर पैसे जमा केले. उद्देश जमा केलेले पैसे वारंवार मागत होता. परंतू रजत त्याच्या बोलण्याकडे लक्ष देत नव्हता. यावरून त्यांच्यात वाद झाला.
रजत रविवारी दुपारच्या सुमारास सोनालीच्या घरी गेला. उद्देश व त्याच्या मित्रांना याची माहिती मिळाली. तिघेही मित्र सोनालीच्या घरी गेले. रजतला बोलावून पैशाची मागणी केली. परंतु, रजत टाळाटाळ करीत असल्याने तिघांनीही रजतला मारहाण केली. उद्देश ने चाकू काढून त्याच्यावर हल्ला केला. मध्यस्थीसाठी गेलेली सोनालीसुध्दा जखमी झाली. आरोपींनी तिलाही मारहाण केली आणि पळून गेले. माहिती मिळताच पोलीस घटनास्थळी पोहोचले. रजतला मेयो रूग्णालयात दाखल करण्यात आले. या प्रकरणी पोलिसांनी आरोपी विरूध्द विविध कलमान्वये गुन्हा नोंदवत अटक केली.
