अकोला : बाळासाहेब ठाकरे कृषी व्यवसाय व ग्रामीण परिवर्तन (स्मार्ट) प्रकल्पांतर्गत राज्यातील ३०५ बाजार समित्यांची आणि ६८ खासगी बाजारांची सन २०२३-२४ या वर्षाच्या कामगिरीवर आधारित वार्षिक क्रमवारी पणन संचालनालयाकडून जाहीर करण्यात आली आहे. या क्रमवारीनुसार राज्यातील पहिल्या १० मध्ये विदर्भातील सहा बाजार समित्यांनी स्थान मिळवत आपला दबदबा राखला. हिंगणघाट प्रथम, कारंजा लाड द्वितीय, चांदुर बाजार पाचव्या, तर अकोला बाजार समितीने सहावे स्थान प्राप्त केले.
बाजार समित्यांची तसेच खाजगी बाजारांची क्रमवारी निश्चित करण्यासाठी पणन संचालनालयाकडून जागतिक बँकेच्या सुचनेनुसार शेतमालाच्या विक्री व्यवस्थेसाठी बाजार समितीत असलेल्या पायाभूत व इतर सुविधा, आर्थिक व वैधानिक कामकाज, योजना, उपक्रम राबविण्यातील सहभाग यानुसार ३५ निकष तयार करण्यात आले होते. बाजार समित्यांच्या निकषासाठी २०० गुण व खाजगी बाजारांसाठी २५० गुण निश्चित करण्यात आले होते.
बाजार समित्यांच्या वार्षिक क्रमवारीनुसार राज्यात पहिल्या १० बाजार समित्यांमध्ये वर्धा जिल्ह्यातील हिंगणघाट बाजार समिती १७८ गुण मिळवून पहिल्या क्रमांकावर, वाशीम जिल्ह्यातील कारंजा लाड बाजार समिती १७१.५ गुणांसह दुसऱ्या स्थानी, अमरावती जिल्ह्यातील चांदूर बाजार १५५.५ गुणांसह पाचव्या स्थानी, १५४.५ गुणासह अकोला सहाव्या स्थानी, नागपूर जिल्ह्यातील उमरेड १५२.५ सातव्या तर १४९ गुण मिळवून वाशीम जिल्ह्यातील मंगरुळपीर आठव्या स्थानावर आहे.
तसेच राज्यातील सहकार विभागाच्या रचनेनुसार अमरावती विभागात कारंजा लाड प्रथम, चांदूर बाजार द्वितीय, तर अकोला तिसऱ्या स्थानावर आहे. नागपूर विभागात हिंगणघाट प्रथम, उमरेड द्वितीय व गडचिरोली जिल्ह्यातील आरमोरी तिसऱ्या स्थानावर आहे. या क्रमवारीमुळे विदर्भातील बाजार समित्यांच्या गुणवत्तेवर शिक्कामोर्तब झाले.
या क्रमवारीमुळे शेतकऱ्यांना बाजार समित्यांमध्ये तसेच खासगी बाजारांमध्ये आकर्षित करण्यासाठी अधिकाधिक सुविधा देण्याची निकोप स्पर्धा निर्माण होण्यास चालना मिळेल. शेतकऱ्यांच्या हितासाठी बाजार समित्यांनी अधिक जोमाने कामकाज करावे, असे आवाहन पणन संचालक विकास रसाळ यांनी केले.
खासगी बाजार समित्यांमध्ये यवतमाळची आघाडी
खासगी बाजार समित्यांमध्ये राज्यातील पहिल्या पाचमध्ये यवतमाळ येथील कॉटनसिटी ॲग्रो फुड्स प्रथम, तर यवतमाळ जिल्ह्यातीलच शेलू बु. येथील किसान मार्केट यार्ड बाजार समितीने द्वितीय स्थान पटकावले.