काश्मीरमधील दहशतवादी हल्ल्यानंतर महाराष्ट्रातील पर्यटकांवर आणखी एक संकट, भूस्खलनामुळे…

गेले काही दिवस पर्यटकांसाठी विविध संकटाचे ठरत आहेत. काश्मीरमध्ये दहशतवाद्यांनी पर्यटकांना लक्ष्य करीत मोठा हल्ला केला. ‘छोटे स्वित्झर्लंड’ म्हणून ओळखल्या जाणाऱ्या पहलगाममधील बैसरन भागात मंगळवारी दहशतवाद्यांनी पर्यटकांना ठार केले. यावेळी अकोल्यातील सुमारे ३१ पर्यटक काश्मीरमध्ये होते. पहलगामला पोहोचण्यापूर्वीच हल्लाची त्यांना माहिती मिळाली. त्यामुळे त्यांना जाण्यापासून रोखण्यात आले. विशेष विमानाने ते अडकलेले पर्यटक मुंबईला परतले. त्यानंतर बसने हे पर्यटक सुखरुप अकोल्यात दाखल झाले आहेत. दरम्यान, महाराष्ट्रातील पर्यटकांसाठी आणखी एक धक्कादायक वृत्त समोर आले.

राज्यातील सुमारे १०० हून अधिक पर्यटक सिक्कीममध्ये भूस्खलनामुळे अडकले आहेत. त्यामध्ये अकोल्यातील १६ पर्यटकांचा समावेश आहे. सिक्कीममधील लाचूंग येथे मोठ्या प्रमाणात भूस्खलन झाले. त्यामध्ये पर्यटक अडकून पडले. राज्यातील मुंबई, पुणे, नागपूर आणि अकोल्यातील पर्यटक त्यात आहेत. अकोल्यातील चार डॉक्टर कुटुंबासह एकूण १६ जण सिक्कीममध्ये अडकले आहेत. लाचूंग हे ठिकाण सिक्कीममधील मंगन जिल्ह्यातील प्रसिद्ध पर्यटन स्थळ आहे. या ठिकाणी फिरण्यासाठी गेलेले अकोल्यातील १६ जण अडकले आहेत.

पुरुष, महिला आणि लहान मुलांचा देखील त्यात समावेश आहे. अकोल्यातील डॉ. शितल टोंगसे, डॉ. प्रशांत बारापात्रे, डॉ. संजय शिंदे आणि डॉ. प्रभाकर जायभाये हे चार डॉक्टर कुटुंबीयांसह पर्यटनासाठी गेले होते. दरम्यान, महाराष्ट्र सरकारकडून देखील सिक्कीम राज्यातील सरकार आणि प्रशासनाशी संपर्क करून पर्यटकांना मदत करण्यासाठी प्रयत्न केले जात आहेत.

सिक्कीम राज्यात प्रचंड पाऊस, भूस्खलनाने अनेक मार्ग बंद

सिक्कीम राज्यात गेल्या काही दिवसांपासून प्रचंड प्रमाणात पाऊस पडत आहे. या पावसामुळे सिक्कीम राज्यातील अनेक भागात मोठ्या प्रमाणात भूस्खलन झाले. त्यामुळे रस्ते बंद पडले आहेत. या ठिकाणी हजारो पर्यटक अडकले आहेत. अडकलेल्या पर्यटकांसाठी युद्धस्तरावर मदत कार्य सुरू असून त्यांना बाहेर काढण्याचे प्रयत्न केले जात आहेत.