राज्यात २०२४ पर्यंत महाविकास आघाडीचे सरकार येईल आणि महाविकास आघाडीचाच मुख्यमंत्री होईल असा दावा खासदार संजय राऊत यांनी आज माध्यमांशी बोलताना केला होता. यावरून विविध राजकीय प्रतिक्रिया येत असताना आमदार बच्चू कडू यांनी संजय राऊतांना खोचक टोला लगावला आहे. आज अमरावतीत प्रसारमाध्यमाच्या प्रतिनिधींशी बोलता त्यांनी ही प्रतिक्रिया दिली.
हेही वाचा – ठाकरे गटाची याचिका न्यायालयाने फेटाळल्यानंतर संजय राऊतांची पहिली प्रतिक्रिया; म्हणाले, “आम्हाला गुंतवून…!”
काय म्हणाले बच्चू कडू?
“संजय राऊतांना जेलमध्ये असताना एखादी मातामाय भेटली असेल तिच्याच सांगण्यावरून त्यांनी हे विधान केलं असेल, असा खोचक टोला बच्चू कडू यांनी संजय राऊतांना लगावला आहे. यावेळी बोलताना त्यांनी संजय राऊतांच्या मध्यावधी निवडणुकांच्या दाव्यावरही प्रतिक्रिया दिली. या सर्व भूलथापा आहेत. राहिलेले आमदार फुटून शिंदे गटात जाऊ नये, यासाठी अशी विधाने केली जात आहे”, असेही ते म्हणाले.
नेमकं काय म्हणाले होते संजय राऊत?
आज सकाळी प्रसारमाध्यमांच्या प्रतिनिधींशी बोलताना त्यांनी एक मोठं विधान केले होते. “ शिंदे गट आणि भाजपाविरुद्धची लढाई संपलेली नाही. ही न संपणारी लढाई आहे २०२४ पर्यंत. आम्हाला पूर्ण खात्री आहे की २०२४ पर्यंत महाविकास आघाडीचाच मुख्यमंत्री होईल. हे मी आजच्या दिवशी सांगतो आहे आणि मी माझ्या या भूमिकेवर ठाम आहे. मी बाहेर असेन किंवा या लोकांनी मला परत बंद केलेलं असेल पण माझ्या भूमिकेवर मी ठाम आहे”, अशी प्रतिक्रिया त्यांनी दिली होती.
