अनिल कांबळे, लोकसत्ता
एकाच कार्यालयात नोकरी करीत असताना विवाहित सहकाऱ्याशी एका तरुणीचे सूत जुळले. तिने आईवडिलांच्या प्रेमाची आणि बदनामीची तमा न बाळगता प्रियकरासोबत राहण्याचा निर्णय घेतला. तिच्या या निर्णयाने दुसऱ्या एका निष्पाप स्त्रीचा संसार मात्र अकारण धोक्यात आला. अखेर या प्रकरणात भरोसा सेलने मध्यस्थी केली व तरुणीचे समूपदेशन करीत दुसऱ्या स्त्रीचा मोडू पाहणारा संसार सावरला.
हेही वाचा >>> नक्षलग्रस्त भागातील चिमुकल्या ‘प्रिन्स’चा शिक्षणासाठी संघर्ष, शाळेत पोचण्यासाठी रोज सहा किमी जंगलातून पायपीट
स्विटी (काल्पनिक नाव) ही एका खासगी कंपनीत नोकरीला लागली. तिचा कार्यालयातील विवाहित सहकाऱ्यावर जीव जडला. तो नेहमी तिला घरी सोडायला यायला लागला. त्यामुळे आईने स्विटीला विश्वासात घेऊन विचारणा केली. तिने प्रियकर असल्याची कबुली देऊन लग्न करणार असल्याचे सांगितले. त्यामुळे आईच्या जीवाची घालमेल झाली. मुलीची अनेकदा समजूत घातल्यानंतरही ती ऐकत नव्हती.
स्विटीच्या प्रेमात पडलेल्या तिच्या विवाहित प्रियकरानेही पत्नी व मुलांसह सुरू असलेल्या आनंददायी संसारावर पाणी सोडण्याची तयारी दर्शविली. त्यामुळे स्विटीनेही कुुटुंबाच्या विरोधात बंड पुकारून विवाहित प्रियकराशी लग्न करण्याचा निर्णय घेतला.
हेही वाचा >>> अनिल देशमुखांच्या भाजप प्रवेशाची चर्चा, प्रस्ताव कोणी कोणाला दिला ?
…अन् प्रेमाचे भूत उतरले भरोसा सेलमध्ये पोलीस निरीक्षक असलेल्या सीमा सूर्वे यांच्याकडे स्विटीच्या आईने तक्रार केली. सूर्वे यांनी स्विटी आणि तिच्या आईला कार्यालयात बोलावले. स्विटीला लग्न करण्याबाबत असलेल्या कायदेशीर अडचणींचा तिढा सांगितला. तसेच एका महिलेचा संसार तोडण्याच्या पातकाबाबतही अवगत केले. एक चिमुकला आपल्या वडिलांच्या प्रेमाला कसा मुकणार याची जाणीव करून दिली. त्यानंतर स्विटीच्या डोक्यातून प्रेमाचे भूत उतरले. तिने लगेच प्रियकराशी चर्चा करून प्रेमसंबंध तोडले व नोकरी आणि शिक्षणावर भर देण्याची तयारी दर्शविली.
