नागपूर : भाजपा नेत्या सना खान हत्याकांडाचा मुख्य आरोपी अमित शाहू तपासात पोलिसांना सहकार्य करीत नसून वारंवार पोलिसांची दिशाभूल करीत आहे. अमित वेळोवेळी वेगवेगळी माहिती देत असल्यामुळे पोलिसांच्या तपासात अडचणी निर्माण झाल्या आहेत.
जबलपूरमधील कुख्यात दारु तस्कर अमित शाहू याच्यासह राकेश सिंह आणि जीतेंद्र गौड यांना नागपूर पोलिसांनी भाजपा नेत्या सना खान हत्याकांडात अटक केली आहे. पोलिसांनी शुक्रवारी अमित आणि राकेश यांना दुसऱ्यांदा न्यायालयात हजर केले. न्यायालयाने २२ ऑगस्टपर्यंत पोलीस कोठडीत ठेवण्याचे आदेश दिले. २ ऑगस्टला अमितने प्रेयसी सना खान यांचा जबलपूरमधील फार्महाऊसमध्ये खून केला. सना यांचा मृतदेह हिरन नदीच्या पात्रात एका पुलावरून फेकला. मात्र, सना खान हत्याकांडाला १८ दिवसांचा कालावधी उलटल्यानंतरही सना यांचा मृतदेह पोलिसांना सापडला नाही.
अमितने ज्या कारमध्ये सना यांचा मृतदेह टाकून नेला, ती कार पोलिसांनी जप्त केली. तसेच अमितच्या घरातून सना यांच्या कपड्याची बॅगही जप्त केली आहे. तीन दिवसांपूर्वी सिहोर परीसरातील एका विहिरीत आढळलेला एका तरुणीचा मृतदेह सना यांचा नसल्याचा दावा मेहरूनिसा खान यांनी केला आहे. त्यामुळे अमितने सना यांचा खून केल्यानंतर मृतदेह नदीत फेकला की अन्य कुठे पुरला याबाबत संभ्रम निर्माण झाला आहे. अमित पोलिसांना वारंवार वेगवेगळी माहिती देऊन दिशाभूल करीत असल्यामुळे पोलिसांच्या तपासातही अडचणी निर्माण होत आहेत.
हेही वाचा – एमपीएससीची ३० सप्‍टेंबरपासून ३३ संवर्गासाठी मुख्य परीक्षा, निकाल डिसेंबरमध्‍ये
हेही वाचा – नागपूर : प्रेयसी गर्भवती, प्रियकर म्हणतो ‘तो मी नव्हेच..’
आणखी एका आरोपीला अटक
सना खान यांचा खून केल्यानंतर अमितला मृतदेहाची विल्हेवाट लावण्यासाठी मदत करणाऱ्या धर्मेंद्र यादव याला नागपूर पोलिसांनी अटक केली. त्याला रविवारी विशेष न्यायालयात हजर करण्यात येणार आहे.
