बुलढाणा: बुलढाणा मतदारसंघातील महायुतीतील नाराजी व मनधरणी नाट्याला आज कमालीचा वेग आला. मुख्यमंत्री शिंदे यांनी भाजपा बंडखोर विजयराज शिंदे यांच्याशी संपर्क साधला तर आज भाजपा संकटमोचक गिरीश महाजन बुलढाण्यात दाखल झाले. दुसरीकडे ‘टीम बंडखोर’ नागपुरात दाखल झाली आहे. यामुळे या वेगवान घडामोडींचा काय ‘निकाल’ लागतो याकडे जिल्ह्यातील महायुती प्रामुख्याने शिंदेंसेनेचे लक्ष लागले आहे.
बुलढाणा मतदारसंघात शिंदे गटाचे प्रतापराव जाधव यांना उमेदवारी मिळाली आहे. मात्र त्यांच्या विरोधात भाजपचे लोकसभा निवडणूक प्रमुख, माजी आमदार विजयराज शिंदे यांनी बंडाचा झेंडा फडकवला आहे. छाननी मध्ये त्यांचा भाजपचा अर्ज बाद झाला मात्र अपक्ष म्हणून भरलेला अर्ज कायम राहिला. स्थानिक पातळीवरील नेत्यानी केलेले मनधरणी चे प्रयत्न फोल ठरले. एवढेच नव्हे तर शेगाव येथील गजानन महाराजांचे दर्शन घेऊन शिंदेंनी प्रचाराचा नारळ फोडला. एवढेच नव्हे तर खासदार जाधवांचे गृहक्षेत्र असलेल्या मेहकर तालुक्यातील बेलगाव येथून त्यांनी काल शनिवार पासून प्रचाराला दणक्यात सुरुवात केली.
हेही वाचा…‘दारू’वरून राष्ट्रवादी काँग्रेस व भाजपचे कार्यकर्ते आपसात भिडले, चंद्रपुरात नेमके काय घडले? वाचा…
नाराजी व मनधरणी नाट्य
या पार्श्वभूमीवर काल शनिवारी संध्याकाळी, भाजप जिल्हाध्यक्ष गणेश मानटे, आमदार श्वेता महाले यांनी बुलढाण्यातील शिंदेंचे निवासस्थान गाठले. त्यांची दोन तास बंद द्वार बैठक झाली. याचदरम्यान बावनकुळे यांच्याशी फोनवरून झालेल्या चर्चे अंती महाले, मानटे व शिंदेंना नागपुरात पाचारण करण्यात आले. त्यानुसार शिंदे आज नागपुरात दाखल झाले. दरम्यान मध्यान्ही मुख्यमंत्री एकनाथ शिंदें यांनी त्यांना संपर्क केला. त्यांनी सहकार्य करण्याचे सांगितले असता विजयराज शिंदेंनी शिंदे गटाच्या वागणूक व विधानाची माहिती दिली. आपण बावनकुळे यांच्या भेटीला आलो असल्याचे त्यांनी सांगितले.
दरम्यान यापूर्वी मुख्यमंत्र्यांच्या सूचनेवरून भाजप संकटमोचक अशी ओळख असलेले गिरीश महाजन आज सकाळी अकरा च्या सुमारास बुलढाण्यात दाखल झाले. मात्र शिंदे नागपुरात असल्याचे समजताच त्यांनी फोनवरून चर्चा करून परिस्थिती जाणून घेतली. नंतर ते परभणी कडे रवाना झाल्याचे समजते.
‘औकात’ मुळे संघर्ष वाढला
दरम्यान अर्ज दाखल करण्याच्या दिवशी, २ तारखेला माध्यमांशी बोलताना शिंदे गटाचे गुलाब पाटील यांनी, शिंदेंची औकात काय? असा सवाल केला होता. आमदार गायकवाड यांनी, शिंदे यांनी निवडणूक लढवूनच दाखवावी असे आव्हान केले होते.त्यामुळे वाद चिघळला. शिंदेंनी लढण्याचा निर्धार करून प्रचार सुरू केला.
