छगन भुजबळ यांचा डोळा अजित पवारांच्या विरोधी पक्षनेते पदावर आहे. त्यामुळे ते शरद पवारांकडे आपले गुण वाढवण्यासाठी त्यांना जाणता राजा संबोधत आहेत, अशी टीका भारतीय जनता पक्षाचे प्रदेशाध्यक्ष चंद्रशेखर बावनकुळे यांनी केली.
बावनकुळे नागपुरात प्रसार माध्यमांशी बोलत होते. शरद पवार यांच्या कामाबद्दल आमचा आक्षेप नाही. मात्र या जगामध्ये फक्त एकच जाणता राजा आहे, ते म्हणजे छत्रपती शिवाजी महाराज. विरोधी पक्षनेते अजित पवार यांच्या विरोधात भारतीय जनता पक्षाने केलेले आंदोलन उत्स्फूर्तपणे झाले. त्यांनी संभाजी राजे हे धर्मवीर नाही असे वक्तव्य केले. त्यामुळे महाराष्ट्राची जनता पेटून उठली.
हेही वाचा- नागपूर शिक्षक मतदारसंघात भाजपाचा गाणारांना पाठिंबा? चंद्रशेखर बावनकुळे यांचे संकेत
जितेंद्र आव्हाड यांच्या विरोधात जे काही होत आहे ते योग्यच आहे. ते स्टंटबाज आहेत. आपल्या मतदारसंघातील राजकारण जिवंत ठेवण्यासाठी वदग्रस्त वक्तव्य करत राहतात. त्यासाठी ते महाराष्ट्राच्या इतिहासालाही बदलून टाकतात. हिंदुत्वाचा विचार मांडणारा वर्ग कधीच आव्हाडांचे समर्थन करू शकत नाही, असेही बावनकुळे म्हणाले.
