गोंदिया : नियती ती नियतीच असते, ती परीक्षा घेणारच. मात्र अशा परिस्थितीवरही मात करता आली तर सर्वकाही जिंकल्यात जमा आहे. हेच धैर्य गोंदिया जिल्ह्याच्या गोरेगाव तालुक्यातील मुंडीपार येथील आदेश कटरे याने दाखवले.
इयत्ता १० वीमध्ये असलेल्या आदेशचा आज पहिलाच मराठी विषयाचा पेपर होता. १०वीच्या पेपरचे मानसिक दडपण असतानाच त्याचे वडील ठानेश्वर कटरे यांचे आज पहाटे आकस्मिक निधन झाले. वडिलांचा मृतदेह दारात असताना परीक्षेला जावे तरी कसे? असा प्रश्न त्याच्या मनात घोळत होता. मात्र, गैरहजरीने पूर्ण शैक्षणिक वर्ष वाया जाणार, यामुळे आदेशने मन घट्ट करून पेपर देण्याचा निर्णय घेतला. पेपर सुटल्यानंतर मग त्याने वडिलांवर अंत्यसंस्कार केले.
नियतीचा खेळ वेगळाच असतो. नियती कधी कुणाला रडवेल कुणाला हसवेल याचा नेम नाही. बापाचे छत आणि मायेची ऊब मिळते ते नशिबानेच म्हणावे लागेल. गोरेगाव तालुक्यातील मुंडीपार येथील ठानेश्वर कटरे यांचे आज पहाटे निधन झाले. तर ठाणेश्वर कटरे यांचा मुलगा यंदा दहावीत होता. आज त्याचा पहिलाच पेपर. मात्र नियतीने आदेशच्या नशिबात काही वेगळेच ठरविलेले. नशिबाने काय ठरविलेले याचा मागमूसही आदेशला नाही. अशातच डोक्यावरील बापाचे छत कायमचे हरवले. घरातील एकूलता एक मुलगा दहावीचा पहिला पेपर देण्यासाठी मोहाडी येथे जाणार होता. मात्र पहाटे वडिलांचा मृतदेह घरात असताना मुलगा दहावीच्या परीक्षेला मोहाडी केंद्रात पेपर द्यायला जातो. काय मनस्थिती असेल आदेशची. मात्र त्याने दु:ख बाजूला सारून दहावीची परीक्षा दिली.
आदेश ठाणेश्वर कटरे हलाखीच्या परिस्थितीतही शिक्षण घेतोय. घरात अठरा विश्व दारिद्र्य या सर्वात वाट मोकळी करीत आदेशची शिक्षणासाठी धाडसी धडपड कौतुकास्पद आहे. एकीकडे आदेशच्या वडिलांचा घरी मृतदेह आणि दुसरीकडे मोहाडी केंद्रात आदेशच्या हातात मराठीचा पेपर. जिथे आयुष्यातील गणित बिघडली असतील तिथे मराठीचा पेपरला सोडवायचे कसे? हा प्रश्न अधोरेखित होता. अशातच आदेश कटरे याने मोहाडी येथे सकाळी ११ वाजेच्या सुमारास दहावीची परीक्षा दिली. एकीकडे मुंडीपार येथील राहते घरी अंथरुणावर मृतक वडील तर दुसरीकडे मोहाडी येथील परीक्षा केंद्रावर आदेशच्या हातात मराठीचा पेपर. दोन्हीपैकी एकाला वेळेवर निवडायचे ही सत्वपरीक्षा आदेशच्या आयुष्याची परीक्षा घेणारी होती. यापैकी आदेश ने मराठीचा पेपर सोडवून सामाजिक बांधिलकी जोपासली वडील हेच शेवटचे परमेश्वर. वडिलांसोबत हा शेवटचा प्रवास. वडिलांना साथ द्यावी लागेल या आत्मविश्वासात आदेश मोहाडी येथून मराठीचा पेपर सोडवून घरी परत आला. वडिलांच्या पार्थिवाला त्याने खांदा दिला आणि सायंकाळी वडील ठाणेश्वर कटरे अनंतात विलीन झाले. या सर्व संवेदनशील प्रसंगाचे गावकरी साक्षीदार झाले.
आदेशला परीक्षा देण्यासाठी शिक्षक रमेश बिसेन व क्षत्रिय पवार समाज संघटनेचे सचिव मोरेश्वर चौधरी यांनी प्रोत्साहित केले. याबाबतची माहिती मिळताच मोहाडी ग्रामपंचायतचे सरपंच नरेंद्र चौरागडे, माजी सरपंच धृर्वराज पटले व इतर ग्रामपंचायत सदस्य गावकऱ्यांनी मोहाडी येथील दहावीच्या परीक्षा केंद्राला भेट दिली. त्यांनी आदेशची भेट घेत त्याचे सांत्वन केले.
