अकोला : घराजवळच राहणाऱ्या युवक-युवतीचे १० वर्षांपासून प्रेमसंबंध होते. मात्र, प्रियकराने दुसरीशीच लग्न उरकले. त्यामुळे प्रेयसी प्रचंड संतापली. तिने आपला भाऊ व त्याच्या साथीदारासह पूर्वाश्रमीच्या प्रियकराला चांगलाच चोप दिला. हे प्रकरण पोलिसात गेल्यावर त्यांनी गुन्हा दाखल केला आहे.
बाळापूर तालुक्यातील कासारखेड येथील २६ वर्षीय युवकाने दिलेल्या तक्रारीनुसार, त्याचे गावातील एका युवतीसोबत प्रेमसंबंध होते. १० वर्षांपर्यंत त्यांचे प्रेमसंबंध फुलले होते. दरम्यान, प्रियकर युवकाचे दुसऱ्या युवतीसोबत लग्न झाले. त्यामुळे त्याने प्रेयसीसोबत बोलणे बंद केले. तिच्याशी संपर्क ठेवण्यास तो टाळाटाळ करत होता. प्रेयसी त्याला सोडायला तयार नव्हती. ती त्याला नियमित संपर्क करत होती.
हेही वाचा – यवतमाळ: घाटंजी येथील निराश्रीत वृद्धांना बांधून दिले घर; ‘रसिकाश्रय’चा पुढाकार
२३ जून रोजी प्रेयसीने त्याला फोन करून ”मला बोलायचे आहे,” असे सांगत बाळापूर जवळील पारस फाट्यावर बोलावले. फाट्यावर येताच युवकाला प्रेयसीच्या भावाने व त्याच्या मित्राने लोखंडी पाइपने जबर मारहाण करून जखमी केले. या प्रकरणात बाळापूर पोलीस ठाण्यात तक्रार दाखल करण्यात आली. पोलिसांनी गुन्हा दाखल केला आहे.
