वर्षभर प्रेमसंबंध ठेवल्यानंतर अचानक ‘ब्रेक अप’ करणाऱ्या तरुणीच्या घरात प्रियकर चाकू घेऊन घुसला. प्रेमसंबंध कायम न ठेवल्यास जीवे मारण्याची धमकी दिली. प्रतापनगर पोलिस तत्काळ घटनास्थळावर पोहोचले आणि त्याला अटक केली. संजू गिरीजाशंकर तिवारी (१८) रा. रामेश्वरी, शताब्दी चौक असे अटकेतील आरोपीचे नाव आहे.
आरोपी संजू तिवारी हा पूर्वी तरुणीच्या घराशेजारी भाड्याने राहात होता. शेजारी असल्याने तिची संजूशी ओळख होती. दोघे एकमेकांशी बोलतही होते. दोघांत मैत्री झाली. दोघांचे सूत जुळले. त्यांचे प्रेमसंबंध जवळपास वर्षभर चालले. मात्र, तरुणीची आणखी एका तरूणाशी मैत्री झाली. त्यामुळे चिडलेल्या संजूने तिची समजूत घातली. त्या युवकाचा नाद सोडण्याची विनंती केली. मात्र, तरुणीने त्यालाच उलटसुलट बोलत प्रेमसंबंध कायम ठेवण्यास नकार दिला. दरम्यान तो दुसरीकडे राहायला गेला. अधून मधून तो मोबाईलवर तिच्याशी बोलत होता. मात्र, ती दुर्लक्ष करायची. दरम्यानच्या काळात त्याने तिचा नाद सोडला. परंतु, त्याचे मन मानायला तयार नव्हते. त्याने अलिकडेच तिला महाविद्यालयात ये-जा करताना पाहिल्यानंतर तो पुन्हा प्रेम करायला लागला. तो तिचा पाठलाग करीत होता. मोबाईलवर तिच्याशी बोलत होता.
मात्र, तिने ब्रेक अप झाल्याचे सांगून त्याला नकार दिला. त्याची तक्रार मुलीने घरच्यांकडे केली. तिच्या आईने त्याच्या कुटुंबीयांची भेट घेतली आणि या त्रासाची माहिती दिली. चिडलेल्या संजू तिवारी हा सोमवारी रात्री अकरा वाजता चाकू घेऊन तरुणीच्या घरी गेला. शिविगाळ करून तिच्या चारित्र्याबाबत बोलत होता. त्याने तरुणीला चाकू दाखवून ठार मारण्याची धमकी दिली. तो पळून जात असतानाच पाठलाग करून त्याला पकडले.
