नागपूर: बहिणीच्या प्रियकराचा चाकूने भोसकून खून करण्यात आला. ही थरारक घटना मंगळवारी मध्यरात्री अजनी पोलीस ठाण्याच्या हद्दीत घडली. निखिल शाहू उके (२८, अजनी) असे खून झालेल्या युवकाचे नाव आहे. पोलिसांनी या हत्याकांडात तीनही आरोपींना अटक केली.
पोलिसांनी दिलेल्या माहितीनुसार, मुख्य आरोपी हिमांशू याच्या बहिणीसोबत निखिल उके याचे प्रेमसंबंध होते. त्याची कुणकुण हिमांशूच्या कुटुंबापर्यंत पोहचली. बहिणीला मारहाण करून तिला प्रेमसंबंध तोडण्यास सांगितले. त्यानंतर निखिल याची समजूत घालून बहिणीपासून दूर राहण्यास सांगितले. यानंतर प्रेमसंबंध ठेवल्यास जीवे मारण्याची धमकी दिली होती. त्यानंतर काही महिने निखिलने संबंध तोडले होते.
हेही वाचा… ग्रंथपालांच्या जीवनात उगवली पहाट! वेतनश्रेणी मिळण्याचा मार्ग मोकळा
मात्र, गेल्या महिन्यात पुन्हा भेटून लग्नाची तयारी करीत होता. त्यामुळे हिमांशूने मित्र अंकित ऊर्फ अन्नी नीलेश वाघमारे (२४, सावित्रीबाई फुलेनगर) आणि विशाल ऊर्फ बब्बू काल्या लक्ष्मण फुलमाळी (२२, कौशल्यानगर) यांना मदत मागितली. मंगळवारी निखिलला घरी बोलावले. तो घराजवळ पोहचताच दबा धरून बसलेल्या तिघांनीही चाकूने हल्ला केला. त्याचा तासाभरातच मृत्यू झाला. याप्रकरणी अजनी पोलिसांनी हत्याकांडाचा गुन्हा दाखल करून आरोपींना अटक केली.
