बुलढाणा : जिल्ह्यातील अनेक गावात नवमीच्या मुहूर्तावर सोंगं काढण्याची परंपरा आहे. बुलढाणा तालुक्यातील खुपगाव या गावानेही ही परंपरा संगणक युगातही जोपसली आहे. यंदाही हा उत्सव उत्साहात पार पडला, मात्र शेतकरी नेते यांनी देवीच्या सोंगा समोर डफड्याच्या तालावर घेतलेल्या ठेक्याने आणि दाखविलेल्या झटक्यांनी जास्तच गाजला. याचा व्हिडीओ समाज माध्यमावर वेगाने व्हायरल होत आहे.
खूपगावतही नवमीच्या मुहूर्तावर रामायण महाभारतातील दशावतारांची रात्रभर डफड्याच्या तालावर सोंग काढण्यात आली . लोक रात्रभर नाचले व रामलीला रामायणाचा कार्यक्रम पार पडला .हुबेहुब रामायणातील पात्रांची वेशभुषा करुन त्याकाळातील परिस्थिती हुबेहूब उभी करण्यात आली. दुसऱ्या दिवशी सकाळी देवीचे सोंग काढण्यात आले . प्रत्येक जण देवीच्या सोंगा समोर नतमस्तक होऊन आपली मनोकामना सांगत व देवीच्या सोंगापुढे नाचत होते. या उत्सवात गावातील सर्व माहेरवाशीण मुली, जावई व गावातील संबंधीत सर्व पाहुणे मोठ्या संख्येने उपस्थित होते.
शेतकरी नेते रविकांत तुपकरांनी या पारंपारिक उत्साहात उपस्थिती लावली. गावकऱ्यांच्या आग्रहाखातर देवीच्या सोंगासमोर डफड्याच्या तालावर, गुलाल उधळत जबरदस्त ठेका देखील धरला. राज्यभर शेतकऱ्यांसाठी झगडणारा आक्रमक व फायरब्रँड नेता म्हणून ओळख ही रविकांत तुपकरांची ओळख. मात्र या सोंगा निमित्त त्यांचे अनोखे रुप यनिमित्ताने बघायला मिळाले.
रविकांत तुपकरांचा डफड्याच्या तालावर नाचतांनाचा व्हिडिओ सोशल मीडियावर व्हायरल होत आहे. नवमीच्या दिवशी संध्याकाळी सर्व गावकरी वाजत गाजत देवीच्या मंदिरात जाऊन देवीची पूजा व आरती करतात. ज्याला पुढच्या वर्षी देवीचे सोंग घ्यायचे आहे. त्याच्यासाठी पैशाची हराशी व बोली लावली जाते. जो जास्त देणगी बोलेल त्याला देवीचे सोंग घेण्याचा मान मिळतो.
आलेल्या देणगीतून गावकरी गावातील मंदिरांचा विकास करण्यासाठी या निधीचा वापर करतात. देवीचे सोंग घेतले की मनातील सर्व मनोकामना पुर्ण होतात व आपली सर्व संकटे दूर होतात, अशी यामागील धारणा आहे. प्रत्येक गावातील गावकऱ्यांची आपल्या गाव कुसातील देवीवर प्रचंड श्रद्धा असते. देवीवरील श्रद्धेपोटी गावकरी तीन चार दिवस सर्व कामे सोडून नवमी उत्सवात सहभागी होत योगदान देतात.जिल्ह्यातील शेकडो आजही ही परंपरा जिवन्त आहे.