चंद्रपूर : शहरातील १७ प्रभागांतील नाल्यांची साफसफाई आणि गाळ उचलण्यासाठी महापालिकेने थेट अमरावती येथून कंत्राटदार आयात केला आहे. तीन वर्षांसाठी १८ कोटी रुपयांना कंत्राट दिले असले तरी सर्वत्र घाणीचे साम्राज्य, साफ सफाई अभावी सर्व प्रभागांतील नाल्या तुडूंब भरलेल्या, गाळ साचलेल्या आणि सर्वत्र दुर्गंधीचे साम्राज्य आहे. महापालिकेतील माजी सत्ताधारी पदाधिकाऱ्यांच्या भागिदारीतून ही सर्व कामे सुरू असल्याची चर्चा पालिकेच्या वर्तुळात आहे. मनपा सर्व प्रकाराच्या साफसफाईवर वर्षांकाठी ३० कोटी रुपये खर्च करते. करापोटी मनपाला केवळ १९ कोटी वर्षाला मिळतात. मनपा आधीच आर्थिक संकटात असताना आता नाली सफाईच्या कामावर कोट्यवधींची उधळण सुरू आहे.
चंद्रपूर महापालिका सत्ताधारी पदाधिकारी असताना भ्रष्टाचाराच्या विविध सुरस कथा, निविदा न काढताच कामे करणे आदी कारणांमुळे सातत्याने चर्चेत होती. आता तर सफाई कंत्राटदार अमरावती येथून आयात केल्याने चर्चेत आली आहे. अमरावतीचे दिपक उत्तराधी यांना शहरातील नाल्या सफाईचे कंत्राट मिळाले आहे. तीन वर्षांसाठी मनपा याकामाचे तब्बल १८ कोटी रुपये कंत्राटदाराला देणार आहे. १ मार्च २०२३ पासून उत्तराधी यांनी काम सुरू केले. याआधी नाली सफाईच्या कामावर २०८ मजूर होते. उत्तराधी यांनी केवळ १३० जणांनाच कामावर सामावून घेतले. निविदेत किती मजूर या कामावर लावायचे याचे बंधन नाही. सतरा प्रभागांतील नाली सफाई आणि गाळ नियमित उचलणे एवढी जबाबदारी कंत्राटदाराला पार पाडायची आहे. याचा फायदा घेत कंत्राटदारने कार्यादेश आदेश मिळताच सफाई मजुरांवर कुऱ्हाड चालविली. त्यांना कामावरून कमी केले. मजुरांनी आंदोलन केले.
आता मजुरांची संख्या १६० झाली आहे. चंद्रपूर शहर जवळपास ८ ते ९ किलोमीटरपर्यंत पसरले आहे. चार लाख लोकसंख्या असलेल्या या शहरात सुमारे ६०० किलोमीटर नाल्यांची लांबी आहे. त्यामुळे नालीसफाईच्या कामावर मनुष्यबळ अपुरे पडत आहे. आधी प्रत्येक प्रभागात नाली सफाई आणि गाळ उचलण्यासाठी ४ ते ५ मजुरांची नियुक्ती व्हायची. परंतु नव्या कंत्राटदाराने ही पद्धत बंद केली. एका प्रभागातील नाल्याची सफाई झाल्यानंतर दुसऱ्या प्रभागात मजूर रवाना केले जातात. त्यामुळे सध्या अनेक प्रभागातील नाल्या तुडुंब भरल्या आहेत. घाण आणि दुर्गंधीने शहरावासी त्रस्त झाले आहे. याकामासाठी कंत्राटदारला पहिल्या वर्षी प्रतिमाह ५१ लाख ६१ हजार ७८६, दुसऱ्या वर्षी ५४ लाख १९ हजार ८७५ आणि तिसऱ्या वर्षी ५६ लाख ९० हजार ८६९ रुपये देण्यात येणार आहे. तीन वर्षांसाठी नाली सफाईवर मनपा तब्बल १८ कोटी रुपये खर्च करणार आहे. या कंत्राटात चंद्रपूर जिल्ह्यातील आणि शहरातील काही राजकीय पदाधिकाऱ्यांचा समावेश आहे. या लोकांना कंत्राटात भागिदारी दिल्यानंतर उत्तराधी यांचा मार्ग मोकळा झाला.
चार लाख लोकसंख्येच्या शहरातील नाली सफाईला १६० सफाई मजूर अपुरे पडतात. कंत्राटदाराने स्वतःचे पैस वाचविण्यासाठी नागरिकांच्या आरोग्याशी खेळ चालविला आहे. कोरोनाचे संकट कायम आहे. अशावेळी शहरातील साफ-सफाईला प्राधान्य देण्याऐवजी पैसे वाचविण्याचा खेळ सुरू आहे, असे चंद्रपूर, माजी नगरसेवक, पप्पू देशमुख म्हणाले.
