नागपूर : कोण म्हणतो, राज्यपालांनी शिवरायांचा अपमान केला? राज्यपालांनी छत्रपती शिवरायांच्या प्रतिमेला धक्का बसेल असे कोणतेही वक्तव्य केले नाही आणि ते तसे करूही शकत नाहीत. कारण, भाजपचा प्रत्येक कार्यकर्ता छत्रपती शिवरायांच्या कामापासून प्रेरणा घेऊन काम करतो, अशा शब्दात भारतीय जनता पक्षाचे प्रदेशाध्यक्ष चंद्रशेखर बावनकुळे यांनी राज्यपालांची पाठराखण केली. बावनकुळे मंगळवारी नागपुरात प्रसार माध्यमाशी बोलत होते. ते म्हणाले, राज्यपाल महाराष्ट्रात आल्यापासून ५० उदाहरणे अशी देता येतील जेव्हा त्यांनी ऐतिहासिक ठिकाणावर जाऊन छत्रपती शिवाजी महाराजांबद्दल आस्था व्यक्त केली आहे. त्यामुळे ते छत्रपती शिवरायांच्या प्रतिमेला धक्का बसेल असे कोणतेही वक्तव्य करूच शकत नाहीत.
राऊतांनी सरकार पाडण्याच्या भानगडीत पडू नये
महाविकास आघाडी सरकारमध्ये समन्वय नव्हता त्यामुळे राज्यात शिंदे- फडणवीस सरकार आले. हे सरकार मजबूत आहे. उद्धव ठाकरे यांचे अनेक कार्यकर्ते आमच्याकडे येत आहेत. त्यामुळे शिवसेना नेते संजय राऊत यांनी सरकार पाडण्याच्या भानगडीत पडू नये, असा खोचक सल्लाही बावनकुळे यांनी दिला.
