नागपूर : मध्यप्रदेशातील कुनो राष्ट्रीय उद्यानातील चित्त्यांना आता मध्यप्रदेश नाही तर उत्तरप्रदेशचा परिसर आवडायला लागला आहे. या आधी कुनोतून ‘ओबान’ या चित्त्याने दोनदा पलायन केले होते. तर आता मादी चित्ता ‘आशा’देखील तब्बल २०-२५ दिवसांपासून बाहेर आहे.
आशा १९ मे पासून कुनो राष्ट्रीय उद्यानाच्या बाहेर होती. यापूर्वी व्यवस्थापन आणि देखरेख पथक चित्ता आशा स्वतःहून परत येण्याची वाट पाहत होते, मात्र माधव राष्ट्रीय उद्यानमध्ये अनेक दिवस राहिल्यानंतर आशा पुढे सरकली आणि अशोकनगरला पोहोचली. जिथे ती उत्तरप्रदेशच्या सीमेवर आणि रहिवासी भागात घुसण्याची शक्यता होती. त्यामुळेच वनविभागाला बचाव करावा लागला. ‘आशा’ ला मोकळ्या जंगलात सोडल्यानंतर तीने तीन वेळा उद्यानाची हद्द ओलांडली होती, पण दूरच्या जंगलांत जाऊन ती स्वतःच उद्यानात परतली.
हेही वाचा – वर्धा : बनावट बियाण्यांची फॅक्टरी उजेडात, कोट्यवधींचा साठा जप्त
यावेळी १९ मे रोजी ती कुनो राष्ट्रीय उद्यानातून बाहेर पडली. येथून निघून गेल्यानंतर आशा शिवपुरी जिल्ह्याच्या सीमेवर सुमारे १७-१८ दिवस राहिली. त्यानंतर तिने शिवपुरीतील माधव राष्ट्रीय उद्यान पार केले आणि अशोकनगरच्या दिशेने निघाली. गेल्या काही दिवसांपासून ती अशोकनगर जिल्ह्यातील इसागडजवळील जंगलात होती. पुढे लोकवस्तीचा परिसर असल्याने उद्यानाच्या अधिकाऱ्यांनी तिला पकडण्याचा निर्णय घेतला, पण हा प्रयत्न यशस्वी झाला नाही.
