बदलता पाऊस पाणी, बाजारभाव, सरकारी धोरण याबरोबरच अनेक कारणांमुळे ज्वारीचे पीक घटले. दिवसेंदिवस गव्हाचे उत्पादन वाढत चालले असून ज्वारीचे पीक घेण्याचे प्रमाण कमी होत चालले आहे. मात्र, कृषी संशोधन केंद्र वाशीम येथे दुर्मिळ आणि अतिप्राचीन ज्वारीच्या २५ हजार जनुके लागवड करून त्याचे उत्तम संगोपन केले आहे. लवकरच देश, विदेशातील कृषी अभ्यासक भेट देऊन या वाणाची पाहणी करणार आहेत.
हेही वाचा >>>नागपूर: अल्पवयीन मुलीची पोटदुखीची तक्रार अन् गर्भवती असल्याचे झाले निदान; प्रियकराविरुद्ध बलात्काराचा गुन्हा
मागील एक दोन दशकांचा विचार करता ज्वारी पीक कमी झाल्याने ज्वारीचे भाव तेजीत आले असले तरी उत्पादन मात्र घटले आहे. परंतु, देशातील ‘नॅशनल ब्युरो ऑफ प्लांट जेनेटिक रिसर्च’ने पुढाकार घेतला असून ज्वारीच्या अतिप्राचीन आणि दुर्मिळ जातीवर संशोधन केले जात आहे. त्यानुषंगाने डॉ. पंजाबराव देशमुख कृषी विद्यापीठ अकोला अंतर्गत कृषी संशोधन केंद्र वाशीम येथे वेगवेगळ्या आणि दुर्मिळ होत चाललेल्या अती प्राचीन ज्वारीच्या २५ हजार जनुकांची लागवड नोव्हेंबरमध्ये करण्यात आली होती. हा अवघड प्रयोग देशातील पहिलाच प्रयत्न असून वाणाची वाढ उत्तम झाली असून पीक देखील बहरले आहे. लवकरच या वाणाची तज्ञ अभ्यासक, शास्त्रज्ञ पडताळणी करणार असून, आगामी काळात हे वाण शेती आणि शेतकऱ्यांना फायद्याचे ठरेल, अशी माहिती कृषी शास्त्रज्ञ गीते यांनी दिली.
केंद्रीय कृषी मंत्री घेणार आढावा
वाशीम येथे १३ मार्च रोजी भव्य कार्यक्रमाचे आयोजन करण्यात आले आहे. केंद्रीय कृषीमंत्री, राज्याचे कृषीमंत्री, कृषी सचिव तसेच विविध अधिकारी आणि मोठ्या संख्येने शेतकरी उपस्थित राहणार असून ज्वारीच्या वाणांचा आढावा घेतला जाणार आहे.
