अकोला : अकोला जिल्ह्यात झालेल्या अतिवृष्टीत आतापर्यंतच्या सर्वेक्षणात एक लाख ४२ हजार ७५२ हेक्टर आर. शेती क्षेत्राचे नुकसान झाले आहे. पंचनामे व सर्वेक्षणाच्या प्रक्रियेला वेग देण्यात आला असून ती लवकरात लवकर पूर्ण करण्याचे आदेश जिल्हा प्रशासनाने यंत्रणेला दिले आहेत. जिल्ह्यात या महिन्यात १३, १९, २२ व २३ जुलै रोजी अतिवृष्टी झाली. ५२ महसूल मंडळांपैकी ३४ मंडळे अतिवृष्टीने बाधित झाली.
आपत्तीमुळे तीन व्यक्ती मृत्यू पावल्या आहेत. आपत्ती व्यवस्थापन यंत्रणेतर्फे पाच गावांत बचाव कार्य करण्यात आले. एनडीआरएफ, तसेच स्थानिक बचाव पथकाने पुरामुळे अडकलेल्या ३० व्यक्तींना सुरक्षितस्थळी पोहोचविले. २४८ कुटुंबाना सानुग्रह मदत देण्यात आल्याची माहिती जिल्हाधिकारी कार्यालयातील आपत्ती व्यवस्थापन कक्षातर्फे देण्यात आली.
आतापर्यंतच्या सर्वेक्षणात प्राथमिक अंदाजानुसार एक लाख ३७ हजार ६७८ हेक्टर आर. क्षेत्रावरील पिकांचे नुकसान झाले, तसेच पाच हजार ७४ हेक्टर आर. शेतजमीन खरडून गेली. अतिवृष्टीत पशुधनातील १५ दुधाळ व आठ लहानमोठी अशी २३ जनावरे दगावली. जिल्ह्यातील १० रस्ते व पाच पूल अशा १५ पायाभूत सुविधांचे नुकसान झाले.
