लोकसत्ता प्रतिनिधी
नागपूर: चांगला परतावा देण्याचे आमिष दाखवून एका महिलेची ३७ लाख ४८ हजार रुपयांनी फसवणूक केली. अलिकडे सायबर गुन्हेगार व्हॉट्अ‍ॅपवर मॅसेज पाठवून युट्यूब वरील व्हिडीओला लाईक करण्यास सांगतात. त्याच्या बदल्यात चांगला परतावाही देतात. महिनाभर चांगला आर्थिक फायदाही मिळतो. पुढचा व्यक्ती जाळ्यात अडकल्याचे लक्षात येताच त्याला मोठे टार्गेट देवून लाखो रुपयाची गुंतवणूक करण्यास सांगतात आणि येथेच लोकांची फसवणूक होते. सायबर गुन्हेगाराकडून अशा फसवणुकीच्या घटना वाढत चालल्या असून अनेक जण बळी पडत आहेत.
गोधनी रेल्वे, मानकापूर येथील रहिवासी फिर्यादी पूजा अग्रवाल (४३) या घरी असताना त्यांच्या मोबाईलवर व्हॉट्सअ‍ॅप मॅसेज आला. ओम एलआयकॉम एमइंडियाएन ग्रुप ह्युमन रिसर्चचा कर्मचारी असल्याचे त्याने सांगितले. युट्यूबवर लाईक करण्याचे काम दिले. दिलेल्या अवधीत काम पूर्ण झाल्यास चांगला परतावा मिळणार होता. महिलेने टार्गेट पूर्ण केले. त्यांना चांगला आर्थिक फायदा झाला.
हेही वाचा… नागपुरात कुलगुरूंच्या दालनात भाजप आमदाराचे आंदोलन, काय आहे प्रकरण वाचा
फिर्यादीला चांगला फायदा होत असल्याने त्या आरोपीच्या जाळ्यात अडकल्या. त्याने पूजा यांना क्रिप्टो करन्सी या फर्मवर खाते उघडून टार्गेट पूर्ण करण्यासाठी गुंतवणूक केल्यास चांगला परतावा मिळेल, असे आमिष दाखविले. त्यामुळे पूजा यांनी ३७ लाख ४८ हजार रुपयाची गुंतवणूक केली. ती रक्कम ऑनलाईन पाठविली. यानंतर त्यांना परतावा मिळाला नाही. त्यामुळे पूजाची चिंता वाढली. त्यांनी संपर्क साधला असता आरोपीने पुन्हा रक्कमेची मागणी केली. यावेळी आपली फसवणूक झाल्याचे लक्षात आले. या प्रकरणी पूजा यांनी दिलेल्या तक्रारीवरून मानकापूर पोलिसांनी आरोपी विरूध्द गुन्हा नोंदविला.
