धक्कादायक ! प्रशिक्षणार्थीना अतिसंवेदनशील विभागात कामासाठी अधिकाऱ्यांचीच बळजबरी; आंदोलन पेटले

भंडारा शहरापासून सुमारे १५ किलोमीटर अंतरावर साहुली गावाजवळ आयुध निर्माण कंपनी आहे. हजारावर कामगार तिथे वेगवेगळ्या सेक्शनमध्ये आणि वेगवेगळ्या शिफ्टमध्ये काम करतात. येथे अत्यंत उच्च दर्जाची स्फोटके तयार केली जातात. या कारखान्यात एचएमएक्स आणि आरडीएक्स सारखे साहित्य तयार केले जाते, ज्याचा वापर शेवटी दारूगोळा भरण्यासाठी केला जातो. हा कारखाना पुणे-मुख्यालय असलेल्या म्युनिशन्स इंडिया लिमिटेडच्या अंतर्गत येतो.

या कारखान्याच्या कमी तापमानाच्या प्लास्टिक स्फोटक निर्मिती युनिटमध्ये २४ जानेवारी रोजी भीषण स्फोट झाला. ज्यात ८ जणांचा बळी गेला तर ५ जण मृत्यूशी झुंज देत आहेत. मृतांमध्ये २० वर्षांचा अंकित बारई नावाच्या शिकाऊ विद्यार्थ्यांचाही नाहक बळी गेला. तर सुनील कुमार यादव या शिकाऊ विद्यार्थि गंभीर जखमी आहे. या घटनेचे पडसाद संपूर्ण राज्यात उमटले असून एलटीपीई सारख्या अती संवेदनशील विभागात शिकाऊ विद्यार्थ्यांना कुणी काम करण्यास सांगितले असा प्रश्न उपस्थित झाला.

कंपनीतील एका शिकाऊ विद्यार्थ्यांने सांगितले की, मागील अनेक वर्षांपासून हा प्रकार सुरू आहे. वरिष्ठ अधिकाऱ्यांना वारंवार याबाबत निवेदन देऊन प्रशिक्षणार्थीना अशा विभागात कामासाठी पाठवू नये असे सांगण्यात आले. मात्र अधिकाऱ्यांकडून या प्रशिक्षणार्थींना कायम दबावात ठेवण्यात येत होते. कुणी विरोध केला तर ‘ काम करायचे असेल तर करा नाही तर नोकरी सोडून द्या ‘ असे उर्मटपणे सांगितले जायचे. त्यामुळे नाईलाजास्तव या प्रशिक्षणार्थींना येथे काम करावे लागत होते.

जीएम कार्यालयासमोर आंदोलन…

२० वर्षीय अंकित बारई या प्रशिक्षणार्थीचा नाहक बळी गेल्यानंतर इतर कर्मचाऱ्यांनी आक्रमक भूमिका घेतली आहे. अनेक कर्मचारी, प्रशिक्षणार्थी यांनी रात्री उशिरा साहुली पोलीस ठाण्यात तक्रार दाखल केली. वरीष्ठ अधिकारी यांच्यावर कारवाईची मागणी केली असून आज सकाळ पासून परिसरात तणावाचे वातावरण निर्माण झाले आहे. अंकित बारई याला न्याय मिळावा या मागणीसाठी आंदोलन पेटले आहे.

मनुष्यवधाचा गुन्हा का दाखल करू नये…

सुरक्षा नियमांना जे लोक बगल देतात, जी कुणी अथॉरिटी असेल, त्यावर मनुष्य वधाचा गुन्हा का दाखल करण्यात येऊ नये. हे सर्व फास्ट ट्रॅक कोर्टामार्फत निकाली काढावीत, जनसामान्य किंवा प्रशासन केवळ मुकदर्शी आणि संवेदना हीन झालेले आहेत, घटनेची सखोल चौकशी झाली पहिजे जेणेकरून पुन्हा घटनेची पुनरावृत्ती होऊ नये. प्रवीण उदापुरे, माजी सिनेट सदस्य…