ईव्हीएम घोळ : भाजपची तक्रार, न्यायालयाने कॉँग्रेस आमदाराला मागितले स्पष्टीकरण…

या आमदाराविरोधात आरोप

अकोला पश्चिम मतदारसंघातून काँग्रेसचे विजयी उमेदवार साजिद खान पठाण गैरमार्गाने निवडून आल्याने त्यांची आमदारकी रद्द करावी, अशी विनंती करणारी याचिका भाजपचे उमेदवार विजय कमलकिशोर अग्रवाल यांनी नागपूर खंडपीठात दाखल केली आहे. याप्रकरणी मुंबई उच्च न्यायालयाच्या नागपूर खंडपीठाने पठाण यांना नोटीस बजावली आणि भूमिका मांडण्याचे आदेश दिले.

विधानसभा निवडणुकीच्या निकालाबाबत अनेकांनी प्रश्न निर्माण केले. विदर्भातील अशा अनेक पराभूत उमेदवारांनी निवडून आलेल्या आमदाराविरोधात याचिका दाखल केल्या आहेत. यात मुख्यत्वे आघाडीच्या तसेच भाजपविरुद्ध लढलेल्या उमेदवारांचा समावेश आहे. मात्र, काँग्रेसच्या विजयी उमेदवाराविरुद्ध केवळ एकच याचिका आली आहे. अकोला पश्चिम मतदारसंघातील भाजपचे अधिकृत उमेदवार विजय कमलकिशोर अग्रवाल यांनी काँग्रेसचे विजयी उमेदवार साजीद पठाण याच्या विजयाला आव्हान दिले आहे. यावर न्या. अनिल पानसरे यांच्या खंडपीठासमक्ष सुनावणी झाली. न्यायालयाने या प्रकरणी पठाण यांना नोटीस बजावून १८ मार्चपर्यंत उत्तर सादर करण्याचे आदेश दिलेत.

२७ निवडणूक याचिका

विदर्भातील एकूण २७ पराभूत उमेदवारांनी उच्च न्यायालयात याचिका दाखल केल्या आहेत. यात, ईव्हीएमने निवडणूक घेण्यापूर्वी या कायदेशीर प्रक्रियेची पूर्तता निवडणूक आयोगाने केली नाही. निवडणूक घेण्यासाठी नोटिफिकेशन निवडणूक आयोगाने काढले नाही, निकालानंतर पराभूत उमेदवारांना सीसीटीव्हीचे फुटेज, फॉर्म नंबर १७ दिले जात नाही. व्हीव्हीपॅटची मोजणीसुद्धा केली जात नाही, असे आरोप करण्यात आलेत. ॲड. आकाश मून व ॲड. पवन डहाट यांच्यामार्फत या याचिका दाखल करण्यात आल्यात.