नागपूर : राज्यात बहेलिया शिकाऱ्यांची धरपकड सुरू असतानाच नागपूर प्रादेशिक वनविभागाअंतर्गत खापा वनपरिक्षेत्रात वाघाची शिकार उघडकीस आली. शिकाऱ्यांनी वाघाचे चारही पंजे, मिश्या आणि दात काढून नेले आहेत. बहेलिया शिकाऱ्यांना वेसन घालण्यासाठी कारवाई सुरू केली असली तरी अद्याप शिकारींवर लगाम लागलेला नसल्याचे दिसून येते.
खापा वनपरिक्षेत्राअंतर्गत नागलवाडी वनवर्तुळांतर्गत कोरमेटा नियतक्षेत्रातील मौजा सिरोंजी हद्दीत धनगाळा नाल्यामध्ये वाघ पडून असल्याची माहिती स्थानिकांनी नागलवाडी वनपरिक्षेत्र अधिकारी एस. डी. गडलिंगे यांना दिली. गडलिंगे, वनपरिक्षेत्र अधिकारी प्रवीण लेले व इतर वनकर्मचारी घटनास्थळी पोहोचले. यानंतर घटनेची माहिती नागपूर प्रादेशिकचे उपवनसंरक्षक डॉ. भारत सिंह हाडा, सहाय्यक वनसंरक्षक व्ही.सी. गंगावणे यांना देण्यात आली. तीन ते साडेतीन वर्ष वयाच्या वाघाचे चारही पंजे, मिश्या आणि दात शिकाऱ्यांनी नेल्याचे आढळून आले. घटनास्थळाच्या आजूबाजूच्या परिसरात पाहणी केली असता परिसरातील ११ केव्हीच्या विद्युत वाहिनीवरून लोखंडी तार व बांबू खुंट्यांचे सहाय्याने शिकार करण्याकरिता सापळा लावल्याचे स्पष्ट झाले. वाघाची शिकार विद्युत वाहिनीद्वारे करण्यात आल्याचे प्राथमिक तपासात दिसून आले.आरोपींचा शोध सुरू
या प्रकरणातील आरोपींचा शोध घेण्यात येत असून घटनास्थळी आढळलेल्या साहित्याच्या आधारे व यापूर्वी वन्यजीव गुन्ह्यातील आरोपींच्या आधारे शिकाऱ्यांचा शोध घेण्यात येत आहे. या प्रकरणाची चौकशी व तपास उपवनसंरक्षक डॉ. भारत सिंह हाडा यांच्या मार्गदर्शनात अधिकाऱ्यांकडून करण्यात येत आहे.
