वर्धा : गाव खेड्यातच दिसणारे धोतर हे वस्त्र टिकून रहावे म्हणून एक अभियान सूरू झाले आहे. हे एक केवळ प्राचीन वस्त्रच नव्हे तर आधुनिक वेगवेगळ्या वस्त्र प्रकाराचा तो आधार असल्याचा दावा लतिका चावडा करतात. लतिकाज योग ही संस्था चालविणाऱ्या चावडा या एक उत्तम भाषांतरकार व संस्कृत अभ्यासक म्हणून ओळखल्या जातात. त्यांचीच धोती पहनो म्हणजेच धोतर घाला हे अभियान सूरू केले आहे. फेसबुकवर सूरू या अभियानात दर रविवारी एकाची ‘ धोती मॅन ऑफ दि वीक ‘ म्हणून निवड केल्या जात असते. त्याड केवळ भारतातूनच नव्हे तर विदेशातून प्रतिसाद मिळत आहे. प्राचीन काळी मुलं मुली दोघेही धोतर स्वरूपात वस्त्र घालत होते. कालांतराने त्याचे काष्टा किंवा नववारी साडी म्हणून प्रचलन सूरू झाले. यात सहभागी वर्ध्यातील तुषार पांडे म्हणतात की धोतर किंवा अन्य भागात मुंडू किंवा पंचा म्हणून ओळख असलेले हे वस्त्र हलके व हवेशीर आहे. कापसापासून तयार होत असल्याने दमट किंवा उष्ण वातावरणात ते अत्यंत उपयुक्त ठरते. दिल्ली येथील डॉ. राजकुमार हे म्हणतात की विविध स्वरूपात बिहार मध्ये हे धोतर घातल्या जाते.
हेही वाचा : “मृद व जलसंधारण विभागात तीन हजार पदे भरणार”, मंत्री संजय राठोड यांची घोषणा; पालकमंत्रिपदाबाबत म्हणाले…
धोती कुर्ता, धोती पटका, धोती चुनर, धोती दुपट्टा, धोती बंधवा कुर्ता व अन्य स्वरूपात ते परिधान केल्या जाते. प्रसंगनुरूप माझ्याकडे विविध धोतर प्रकार आहेत. अकोला येथील निशिकांत देशपांडे सांगतात की मला धोतर घालण्याची सवय नव्हती. संकोच व्हायचा. पण आता मी बिनधास्त धोतर घालून सार्वजनिक ठिकाणी वावरतो. टांझानिया येथील अंकित भट्ट यांनी आपली प्रतिक्रिया नोंदवितांना म्हटले आहे की माझा जन्म भारताबाहेर झाला. पण पारंपरिक भारतीय वेशभूषावर मी प्रेम करतो. त्र्यंबकेश्वर येथे पूजेसाठी आलो असतांना मी प्रथमच धोतर घातले होते. जर अरब लोकं त्यांचे पारंपरिक वस्त्र घालुनच सर्व व्यवहार देश विदेशात करीत असतील तर आम्ही धोतर घालण्याची लाज बाळगण्याचे कारण नाही. धोतर घाला अभियान सूरू केले हे उत्तमच. आम्ही परंपरेमुळे नाही तर परंपरा आमच्यामुळे हे गृहीत धरावे. सरकारने यास प्रोत्साहन द्यावे, असे भट्ट म्हणतात. धोतरचा प्रसार व्हावा म्हणून पूजा, यात्रा, प्रवास व अन्य ठिकाणी धोतर घालून जावे. असे आवाहन लतिका चावडा करतात. लतिकाज योग अँड यज्ञ् शाळा यावर अधिक माहिती उपलब्ध आहे.
