नागपूर : काँग्रेसचे प्रदेश सचिव नरेंद्र जिचकार यांना पक्षशिस्त मोडल्याबद्दल आणि गैरवर्तणुकीबद्दल प्रदेश काँग्रेस समितीच्या शिस्तपालन समितीने कारणे दाखवा नोटीस बजावली असून सात दिवसात उत्तर सादर करण्यास सांगितले आहे. प्रदेश शिस्तपालन समितीची बैठक १६ ऑक्टोबरला झाली आणि त्यात जिचकार यांना नोटीस बजावण्याचा निर्णय घेण्यात आला.
प्रदेश अध्यक्ष नाना पटोले यांच्या उपस्थितीत नागपुरात झालेल्या विभागीय आढावा बैठक जिचकार यांनी उधळण्याचा प्रयत्न केला. त्यांनी शहराध्यक्ष विकास ठाकरे यांच्याकडून ‘माईक’ हिसकावण्याचा प्रयत्न झाला. त्यामुळे बैठकीत गोंधळ निर्माण झाला, असा ठपका ठेवून तसा अहवाल नागपूर शहर काँग्रेस पक्ष शिस्तपालन समितीने प्रदेश शिस्तपालन समितीचे अध्यक्ष पृथ्वीराज चव्हाण यांना पाठवला होता. यानंतर प्रदेश शिस्तपालन समितीने जिचकार यांना कारणे दाखवा नोटीस बजावली आहे.
