मेयोत डॉक्टरांना मारहाण, तणाव ; निवासी डॉक्टरांमध्ये असंतोष

इंदिरा गांधी शासकीय वैद्यकीय महाविद्यालय व रुग्णालय (मेयो)च्या आकस्मिक विभागात शनिवारी मध्यरात्रीनंतर सेवेवर असलेल्या डॉ. अनिल चव्हाण यांच्यासह सुरक्षारक्षकाला मारहाण झाली. रुग्णाच्या संतप्त नातेवाईकांनी परिचारिकेसोबतही असभ्य व्यवहार केल्याने मेयोच्या निवासी डॉक्टरांमध्ये असंतोष निर्माण झाला आहे. या घटनेने रुग्णालयात तणाव निर्माण झाला होता. महम्मद शहजाद (१८) व त्याच्या दोन साथीदारांनी मारहाण केल्याचा आरोप आहे.
महम्मद शहजाद याला श्वास घेण्यास त्रास होत असल्यामुळे उपचाराकरिता दोन नातेवाईकांनी मेयोत आणले. मुख्य वैद्यकीय कक्षात रुग्णाच्या आजारासह त्याची माहिती विचारल्यावर आकस्मिक विभागात सेवा दिली जाते. मेयोच्या वैद्यकीय अधिकाऱ्यांकडून रुग्णावर उपचार सुरू झाले. दरम्यान अचानक रुणाच्या साथीदारांनी त्याला उचलून बाहेर आणले. बरोबर उपचार करीत नसल्याचा ठपका ठेवत ते डॉक्टरांना धमक्या देऊ लागले आणि मारहाण करण्यास सुरुवात झाली. सुरक्षारक्षक पराग बडोले डॉक्टरांच्या मदतीसाठी आले असता त्यालाही मारहाण झाली. तहसील पोलिसांना कळताच पोलिसांचा ताफा घटनास्थळी पोहचला. त्यापूर्वी डॉ. चव्हाण यांना मारहाण झाली होती. महम्मदच्या मित्रांनी डॉक्टरांवर हल्ला चढवला. मारहाणीची सारी दृष्ये मेयोतील सीसी कॅमेरात चित्रित झाली असून माहिती कळताच मेयोचे अधिष्ठाता डॉ. मधुकर परचंड घटनास्थळी पोहोचले होते. त्यांच्या मध्यस्तीने काही तासात रुग्णसेवा सुरू झाली.

वर्षभरात २१ डॉक्टरांवर हल्ले
राज्यातील सर्वच शासकीय वैद्यकीय महाविद्यालयांमध्ये दहा महिन्यांत २१ निवासी डॉक्टरांना मारहाण झाल्याच्या घटना घडल्या आहे. यावरून शासकीय रुग्णालयातील सुरक्षेवर गंभीर प्रश्न उपस्थित झाले आहे.

‘मार्ड’ मुख्यमंत्र्यांना भेटणार
शासकीय रुग्णालयात उपचारासाठी येणाऱ्या रुग्णांची संख्या जास्त असते. आकस्मिक विभागात १८ ते २४ तास सेवा देऊन निवासी डॉक्टर थकतात. परंतु तरीही रुग्णांच्या सेवेत असतात. गर्दीमुळे रुग्णांना सेवा देण्याकरिता बऱ्याचदा वेळ होतो. जो येतो त्याला तात्काळच बघावे असा प्रत्येकाचा समज आहे. त्याचेही खरे आहे. परंतु रुग्णांचे नातेवाईक डॉक्टरांची मानसिकता समजून घेत नाही. निवासी डॉक्टरांच्या प्रश्नावर मुख्यमंत्री देवेंद्र फडणवीस यांची ‘मार्ड’ भेट घेईल. त्यांना याप्रसंगी रुग्ण व निवासी डॉक्टरांच्या समस्या सोडवण्याकरिता विविध मागण्यांचे निवेदन सादर केले जाणार आहे.