लोकसत्ता टीम
अमरावती : जिल्ह्याचे पालकमंत्री चंद्रकांत पाटील यांनी आज शुक्रवारी अमरावती महापालिकेत आढावा बैठक घेतली. उद्या शनिवार, परवा रविवार व त्यानंतर सोमवारी गुरुनानक जयंतीची सुट्टी असल्याने सामान्य जनतेच्या कामांच्या दृष्टीने आजचा दिवस महत्त्वाचा होता. त्यामुळे शहराच्या कानाकोपऱ्यातून नागरिक आपली कामे घेऊन महापालिकेत आले होते. मात्र पालकमंत्र्यांची बैठक असल्याचे कारण देऊन पोलीस प्रशासनाने संपूर्ण महापालिकेचा परिसर निर्मनुष्य केला व पायपीट करत महापालिकेत आलेल्या सामान्य नागरिकांना महापालिका आवाराच्या बाहेर काढत प्रवेशद्वार बंद करून घेतले.
आणखी वाचा-चंद्रपूर महाऔष्णिक विद्युत केंद्राचे कार्बन उत्सर्जन शून्यतेच्या दिशेने पाऊल
यावेळी प्रवेशद्वारावर कडक पोलीस बंदोबस्त होता. नागरिकांना आत जाण्यास मज्जाव करण्यात आला. यापूर्वी सुद्धा अनेक पालकमंत्र्यांच्या बैठकी महापालिकेत झाल्या. मात्र सामान्य जनतेशी असा व्यवहार आजपर्यंत कुणी केला नाही, अशी प्रतिक्रिया नागरिकांनी व्यक्त केली.
