नागपूर: कन्हान नदीला आलेल्या पुरामुळे शहराला पाणी पुरवठा करणाऱ्या जलशुद्धीकरण केंद्राच्या विहिरीत पाणी शिरले आहे. त्यामुळे शहराच्या काही भागात पाणी पुरवठ्यावर परिणाम होण्याची शक्यता आहे. गुरूवारी मध्यरात्रीशुक्रवारीपासून शुक्रवारी दुपारपर्यंत सुरू असलेल्या संततधार पावसामुळे कन्हान नदी दुथडी भरून वाहू लागली. त्यातच शुक्रवारी सायंकाळी नवेगाव खैरी जलाशयाचे सर्व १६ दरवाजे उघडण्यात आल्याने कन्हान नदीला पूर आला. पाण्याच्या पातळीत दर तासाला ०.५ मीटरने वाढत आहे. नदीचे पाणी कन्हान जलशुद्धीकरण विहिरीत शिरल्याने जलशुद्धीकरणाच्या कामावर परिणाम झाला आहे. सध्या तीनपैकी एकाच पंप सुरू आहे. शनिवारी पाण्याच्या पातळीत घट होताच कच्चे पाणी शुद्ध करण्याची प्रक्रिया सुरू केली जाईल. हेही वाचा. पाऊस कमी तरीही गडचिरोलीत पूरस्थिती, राष्ट्रीय महामार्ग बंद यामुळे कन्हान फीडरच्या मुख्य भागातून पाणीपुरवठा आशी नगर झोन, सतरंजी पुरा झोन, लकरगंज झोन आणि नेहरू नगर झोन आदी भागातील वस्त्यांना पाणी पुरवठा कमी दाबाने होईल किंवा काही भागात होणार नाही.
