कळमेश्वरमधील बारूद कारखान्यात स्फोट, दोन कामगाराचा मृत्यू : पाच जखमी

आगीवर नियंत्रण

एशियन फायर वर्क्स कंपनीत स्फोटामुळे मोठी आग लागली. कंपनीत ठेवलेले सर्व गठ्ठे आणि सामान आगीत जळाले. पोलिसांनी लगेच अग्निशमन दलाला पाचारण केले. काही वेळातच अग्निशमन दलाची सहा वाहने कंपनीत पोहचली. त्यांनी पाण्याचा मारा करीत दोन तास प्रयत्न करुन आगीवर नियंत्रण मिळवले. त्यानंतर काही वेळातच रुग्णावाहिका पोहचल्या. गंभीर जखमींनी लगेच शासकीय रुग्णालयात हलविण्यात आले.

गावकऱ्यांची गर्दी

एशियन फायर वर्क्स कंपनीत स्फोट होताच मोठा आवाज झाला तसेच कंपनीला आग लागली. त्यामुळे आजुबाजुच्या गावातील अनेकांनी कंपनीच्या दिशेने धाव घेतली. काही मिनिटांतच स्फोटाची वार्ता अनेकांपर्यंत पोहचली. त्यामुळे कंपनीत गावकऱ्यांनी मोठी गर्दी केली होती. काही गावकऱ्यांनी कंपनीतील कर्मचाऱ्यांना मदत केली. मात्र, अनेक जण बघ्याच्या भूमिकेत असल्यामुळे पोलिसांनाही कर्तव्य बजावताना अडचणीचे ठरत होते, हे विशेष.

थोडक्यात वाचले दोघे

कंपनीत काही कामगार दुपारी काम करीत होते. मात्र, रविवार असल्यामुळे काही कामगार कंपनीच्या बाहेर गेले होते. तर दोन कामगार स्फोट होण्याच्या अगदी काही मिनिटांपूर्वीच कंपनीच्या प्रवेशद्वारापर्यंत पोहचले. तेवढ्यातच त्यांना स्फोट झाल्यामुळे आवाज आला. त्यांनी कंपनीबाहेर न जाता कंपनीत स्फोट झाल्याच्या ठिकाणी धाव घेतली. मात्र, त्या दोघांचेही नशिब बलवत्तर होते म्हणून ते थोडक्यात वाचले, अशी चर्चा होती.

सलील देशमुख यांची घटनास्थळाला भेट

एशियन फायर वर्क्स कंपनीत स्फोट झाल्याची माहिती मिळताच राष्ट्रवादी कॉंग्रेसचे (शरदचंद्र पवार गट) नेते सलील देशमुख यांनी कंपनीत धाव घेतली. त्यांनी दोन्ही मृतकांच्या कुटुंबियांची भेट घेतली. गंभीर जखमींच्या नातेवाईकांशी चर्चा केली. स्फोट झालेल्या ठिकाणी भेट देऊन पाहणी केली. यावेळी त्यांच्यासोबत कार्यकर्ते होते.