नागपूर : लग्नातील पोशाखावरून सुरू झालेल्या वादामुळे नवरी मुलीने नवरदेव मुलावरती हुंडा मागणे आणि बलात्कार करण्याची खोटी तक्रार दाखल केली. याप्रकरणी मुंबई उच्च न्यायालयाच्या नागपूर खंडपीठाने मध्यस्थी करत आरोपी मुलावरील गुन्हा रद्द करण्याचे आदेश दिले. न्या. विनय जोशी आणि न्या.वृषाली जोशी यांच्या खंडपीठाने हा निर्णय दिला आहे.
तक्रारकर्ती मुलगी पुण्यातील एका कंपनीत कार्यरत आहे. तिने २१ एप्रिल २०२३ रोजी धंतोली पोलिस ठाण्यात मुलाविरोधात हुंडा मागणे आणि बलात्काराची तक्रार दाखल केली. त्या आधारावर पोलिसांनी मुलावर गुन्हा दाखल केला. याविरोधात मुलाने उच्च न्यायालयात धाव घेतली या मुलाची तक्रारकर्ती मुलीची फेसबुकच्या माध्यमातून नोव्हेंबर २०२१ मध्ये ओळख झाली. या ओळखीचे प्रथम मैत्रीत आणि नंतर प्रेमात रूपांतर झाले. मुलगा हा चंद्रपूरमध्ये कार्यरत होता तर मुलगी नागपूरमधून ‘वर्क फ्रॉम होम’ करत होती. फेसबुकवर ओळख झाल्यावर जानेवारी २०२२ मध्ये त्यांची भेट झाली. या भेटीदरम्यान त्यांच्यात शारीरिक संबंध प्रस्थापित झाले. यानंतर दोघांनीही आपल्या कुटुंबियांना आपल्या प्रेमाबाबत माहिती दिली.
नोव्हेंबर २०२२ मध्ये त्यांचा साखरपुडा झाला आणि ११ मे २०२३ ही लग्नाची तारीख निश्चित झाली. यानंतर लग्नासाठी पोशाखावर चर्चा करताना दोघांमध्येही भांडण झाले. हे भांडण सोडवण्यासाठी दोन्ही कुटुंबियांमध्ये बैठत पार पडली. तक्रारकर्त्या मुलीनुसार, या बैठकीत मुलाच्या आईने आणि बहिणीने लग्नात सोन्याची साखळी आणि चारचाकी वाहन देण्याची मागणी केली. आरोपानुसार, यावेळी दोन्ही पक्षात जोरदार वाद झाला. यानंतर दोघांमधील लग्न तोडण्याचा निर्णय घेण्यात आला.
हेही वाचा…उफ ये गर्मी! उकाडा सहन होईना, ताडोबातील वाघिणीचा बछड्यांसह पाणावठ्यात मुक्काम…
भांडणानंतर मुलाने मुलीद्वारा शिविगाळ केल्यामुळे पोलिसांकडे तक्रार देण्याचा प्रयत्न केला. मात्र पोलिस आणि नातेवाईकांच्या मध्यस्थीमुळे त्याने हा निर्णय मागे घेतला. याबाबत मुलीला माहिती मिळाल्यावर तिने मुलगा आणि त्याच्या कुटुंबियांच्याविरोधात पोलिसात तक्रार दाखल केली. याप्रकरणी न्यायालयाने दोन्ही पक्षांचा युक्तिवाद ऐकल्यावर मुलाविरोधातील गुन्हा बदला घेण्यासाठी दाखल करण्यात आला असल्याचे मत व्यक्त करत गुन्हा रद्द करण्याचे आदेश पोलिसांना दिले.
