नागपूर : समृद्धी महामार्गावर सिंदखेडराजाजवळ विदर्भ ट्रॅव्हल्सच्या अपघातात २५ प्रवाशांचा बळी गेला. घटनेचा मुंबईच्या फाॅरेन्सिक फायर ॲण्ड सायबर इन्वेस्टीगेटर्स या खासगी संस्थेने तपास करून अहवाल बुलढाण्याच्या जिल्हाधिकाऱ्यांना दिला आहे. त्यात आगीचे खरे कारण पुढे आले आहे.
अहवालानुसार, अपघात झाला तेव्हा बसमध्ये ३५० लिटर डिझेल होते. अपघात रात्री १.३२ वाजताच्या जवळपास झाला. अपघातग्रस्त बस साडेअकराच्या सुमारास समृद्धी महामार्गावर आली होती. अपघाताच्या वेळेला बसची गती ७० ते ८० किलोमीटर प्रति तास होती. अपघात झाला तेव्हा बस समृद्धी महामार्गाच्या पहिल्या लेनमध्ये म्हणजे ओवरटेकिंग लेनमध्ये धावत होती. अपघातग्रस्त बसचा समोरचा चाक सुरुवातीला रस्त्याच्या बाजूला असलेल्या साईन बोर्डला धडकला. त्यानंतर समोरचा चाक दहा फूट अंतरावर असलेल्या आरसीसी काँक्रिटच्या दुभाजकाला धडकला. याच दुभाजकाला बसचा पाठीमागचा चाकही त्याच पद्धतीने धडकला आणि त्यामुळे बस एका दिशेने झुकली. जेव्हा बसचा मागील चाक आरसीसी काँक्रिट दुभाजकाला धडकला, तेव्हाही धडक एवढी भीषण होती की मागील टायर फुटला आणि टायरच्या आतील लोखंडी रिंग ही मोडकळीस आली.
हेही वाचा – नागपूर: नवे राजकीय समीकरणावर बावनकुळे म्हणाले, हे महायुतीचे, मविआचे नाही
चालकाच्या बाजूच्या समोरच्या आणि मागच्या चाकाची दुभाजकाला धडक झाल्यानंतर बस एका बाजूला झुकली आणि काही अंतरावर जाऊन डाव्या बाजूला रस्त्यावर उलटली. त्यामुळे बसचा मुख्य द्वार खाली दाबला गेला. फॉरेन्सिक फायर अहवालाप्रमाणे जेव्हा बस एका बाजूला झुकली आणि काही अंतरावर जाऊन डाव्या बाजूने पडली. यावेळी बसच्या समोरचा एक्सेल बसपासून तुटून वेगळा झाला आणि तोच एक्सेल जाऊन डिझेल टॅंक वर आदळला. यामुळे ३५० लिटर डिझेल सर्वत्र उडाले. डिझेल टॅंक फुटल्यामुळे उडालेले हे डिझेल बसच्या इंजिनच्या हॉट एक्झॉस्टच्या संपर्कात आले आणि त्यामुळे बसने पेट घेतला.
