बुलढाणा : जिल्ह्यातील मोताळा येथील एका औषधी विक्री केंद्र (मेडिकल स्टोअर्स) चालकाने औषधी टॅबलेट, कॅप्सूलचा वापर करून गणरायाची मूर्ती साकारली आहे. त्याने आपल्या घरी या अनोख्या गणेशाची स्थापना केली असून दर्शनासाठी भाविकांची रीघ लागली आहे. फार्मासिस्टच्या या आगळ्यावेगळ्या कलेने सर्वांना भुरळ घातली आहे.
हेही वाचा – वेडसर, निराधार वृध्दाच्या संशयास्पद भटकंतीचा शेवट…
दिपक शेळके पाटील असे या व्यावसायिकाचे नाव आहे. मोताळा तालुक्यातील ग्राम भोरटेक येथील रहिवासी असलेले शेळके अलीकडे मोताळा येथे स्थायिक झाले आहे. बसस्थानक परिसरात त्यांचे स्वराज जेनरिक मेडिकल आहे. त्यांनी व्यवसाय सांभाळून कलाकृती निर्मितीचा छंद जोपासला आहे. त्यांनी तयार केलेली मूर्ती यंदाच्या गणेशोत्सवाचे आकर्षण ठरले आहे. कमालीची एकाग्रता राखत ही मूर्ती तयार करावी लागते. थोडीदेखील चूक झाल्यास पुन्हा नव्याने काम करावे लागते, असे शेळके यांनी सांगितले.
