नागपूर: भारतीय जनता पक्षातर्फे सध्या देशभर मंदिर स्वच्छता मोहीम राबवली जात आहे. उपमुख्यमंत्री देवेंद्र फडणवीस यांच्यासह राज्यातील प्रमुख नेते यात सहभागी झालेत. त्यांची छायाचित्रे समाजमाध्यमांवर झळकली. नागपूरही यात मागे नाही.
नागपूरमध्येही भाजप कार्यकर्त्यांनी या उपक्रमात सहभाग घेतला. वाठोड्यातील एका हनुमान मंदिरात स्वच्छता मोहीम सुरू असताना तेथे नमस्कारासाठी आलेल्या नवरदेवालाही कार्यकर्त्यांनी स्वच्छता मोहिमेत सहभागी करून घेतले आणि लगेच त्याचे छायाचित्र प्रसिद्ध झाले.
हेही वाचा – देशभरातच थंडीचा कडाका वाढला; उत्तरेकडील राज्यांना थंडीचा ‘रेड’ व ‘ऑरेंज’ अलर्ट
अयोध्येतील राममंदिर लोकार्पण सोहळ्याच्या निमित्ताने सध्या देशभर भाजपतर्फे वातावरण निर्मितीसाठी विविध कार्यक्रम हाती घेतले जात आहेत. मंदिर स्वच्छता हा त्यापैकीच एक. देश, राज्य पातळीवरील नेत्यांचा सहभाग या कार्यक्रमात असल्याने स्थानिक नेते मागे राहणे शक्य नव्हते. बुधवारी सकाळी भाजपचे शहराध्यक्ष जितेंद्र उर्फ बंटी कुकडे यांनी वाठोडास्थित हनुमान मंदिरात स्वच्छता मोहीम राबवली. त्याचवेळी लग्नासाठी जात असलेला नवरदेव हनुमानजींच्या दर्शनासाठी मंदिरात आला. तेथे सुरू असलेली स्वच्छता मोहीम पाहून तोही त्यात सहभागी झाला.
