नागपूर : नागपूरच्या प्रसिद्ध हल्दीराम कंपनीने वर्षभराच्या वाटाघाटीनंतर अखेर जागतिक गुंतवणूकदारांसोबत सौदा अंतिम केला आहे. सिंगापूरच्या सरकारच्या मालकीच्या टेमासेक होल्डिंग्स कंपनीला ९ टक्के हिस्सा विकण्यात येणार आहे. या व्यवहारामुळे कंपनीचे मूल्यांकन तब्बल ८४,००० कोटींवर गेले आहे. यासोबतच हल्दीराम कुटुंबातील दोन मोठे व्यवसाय—नागपूरचे हल्दीराम फूड्स आणि दिल्लीचे हल्दीराम स्नॅक्स—एकत्र येणार आहेत.

या दोन्ही कंपन्यांचे विलीनीकरण लवकरच अधिकृत करण्यात येणार असून, नव्या कंपनीचे नाव हल्दीराम फूड्स अँड स्नॅक्स असेल. हल्दीराम सध्या मिठाई, नमकीन, रिटेल स्टोअर्स आणि रेस्टॉरंट्समध्ये मोठ्या प्रमाणात कार्यरत आहे. कंपनीची निर्यात मोठ्या प्रमाणावर होत असून, भारताबाहेरही भारतीय लोकसंख्येच्या गरजा भागवत आहे. ब्रँडच्या प्रतिष्ठा, बाजारातील विस्तार आणि भविष्यातील संधींच्या आधारे ही मोठी किंमत ठरवण्यात आली आहे.

अमेरिकेच्या कंपनीला विकण्याच्या अयशस्वी प्रयत्न

यापूर्वी अमेरिकेच्या ब्लॅकस्टोन कंपनीसोबत वाटाघाटी सुरू होत्या, पण त्या यशस्वी झाल्या नाहीत. सुरुवातीला कुटुंबाने आपला बहुतेक हिस्सा विकण्याचा विचार केला होता, पण नंतर तो बहुसंख्य हिस्सा स्वतःजवळ ठेवण्याचा निर्णय झाला. नव्या व्यवस्थेनुसार, टेमासेक कंपनीला बोर्ड ऑफ डायरेक्टर्समध्ये स्थान मिळेल. तसेच, कंपनीचे प्राथमिक समभाग विक्री (आयपीओ) लवकरच बाजारात येणार आहे.

हेही वाचा

पुढील दोन वर्षांत हा आयपीओ  पूर्ण होईल, अशी अपेक्षा आहे. कंपनी या नव्या गुंतवणुकीतून भारतासह जागतिक स्तरावरही आपला विस्तार करणार आहे. हलदीरामचा प्रवास १९६७ मध्ये नागपुरात सुरू झाला होता. संस्थापक शिवकिशन अग्रवाल यांनी इतवारी येथे छोट्या दुकानातून व्यवसाय सुरू केला होता. १९८० मध्ये कुटुंबातील एका सदस्याने दिल्लीमध्ये स्वतंत्र कंपनी स्थापन केली, आणि त्यानंतर हा ब्रँड दोन भागांत विभागला गेला. आता या विलीनीकरणामुळे हळदीरामच्या ब्रँडला आणखी बळकटी मिळेल, असा तज्ज्ञांचा अंदाज आहे.

हेही वाचा

विलीनीकरणाचा निर्णय का घेतला गेला?

दीर्घकाळ हलदीरामच्या दोन कंपन्या स्वतंत्रपणे कार्यरत होत्या. मात्र, बाजारातील वाढता स्पर्धा आणि आंतरराष्ट्रीय विस्ताराच्या संधी लक्षात घेऊन कुटुंबीयांनी व्यवसाय पुन्हा एकत्र आणण्याचा निर्णय घेतला.

१. ब्रँडची एकसंध ओळख: हळदीरामची उत्पादने एका कंपनीच्या नावाखाली विकली जातील, त्यामुळे जागतिक पातळीवर ब्रँडला अधिक स्थिरता मिळेल.

२. उत्पादन आणि वितरण नेटवर्कचा विस्तार: संपूर्ण भारतात एकसंध वितरण प्रणाली निर्माण करता येईल.

३. नवीन आयपीओची तयारी: विलीनीकरणामुळे हळदीरामची बाजारातील किंमत वाढेल, ज्यामुळे कंपनीला शेअर बाजारात प्रवेश करणे सोपे जाईल. ४. आंतरराष्ट्रीय गुंतवणूक आकर्षित करणे: मोठ्या गुंतवणूकदारांसाठी कंपनी अधिक आकर्षक ठरेल.