नागपूर : मध्य रेल्वेने दोन मालवाहू रेल्वेगाड्या एकत्र जोडून मालवाहतूक करण्याचा यशस्वी प्रयोग केला आहे. चालू आर्थिक वर्षातील पाच महिन्यांत अशा ५७ गाड्यांनी मालवाहतूक केली आहे. या प्रयोगामुळे मालवाहतूक जलदगतीने शक्य झाली असून दोन मालगाड्या एकत्र धावल्याने इतर गाड्यांना रेल्वेमार्ग उपलब्ध होत आहे.
मध्य रेल्वे सध्या नागपूर विभागातील अजनी यार्ड आणि भुसावळ यार्ड येथून लांब पल्ल्याच्या मालवाहू गाड्या चालवल्या जातात तसेच अधिक लांबीच्या मालवाहू गाड्यांसाठी अधिक ‘लूप लाईन’ तयार करून माल उतरवणे आणि चढवण्यासाठी सुविधा वाढवल्या जात आहेत. ३० ते ३१ ऑगस्ट २०२३ या दरम्यान मूर्तिजापूर येथे ‘लूप लाईन’चे बांधकाम पूर्ण केले आहे आणि नांदगाव (मनमाडजवळ), माहेजी (जळगावजवळ) आणि बोरगाव (अकोलाजवळ) येथे आणखी तीन लांब पल्ल्याच्या मालवाहतूक ‘लूप लाईन’ तयार करण्याचे काम सुरू आहे.
एका मालगाडीला सुमारे ५० वॅगन असतात. दोन मालवाहू रेल्वेगाड्या एकत्र जोडून म्हणजे १०० वॅगनची मालगाडी नागपूर आणि भुसावळ विभागात सुरू करण्यात आल्याने मालवाहतूक अधिक गतिमान झाली. दोन लांब मालगाड्या धावत असताना किमान दोन गाड्यांमध्ये दोन किलो मीटर किंवा एक सेक्शनचे अंतर ठेवावे लागते. दोन मालगाड्या जोडल्याने हे अंतर ठेवण्याची गरज नाही. त्यामुळे या मार्गावर आणखी एक मालगाडी किंवा प्रवासी गाडी चालवण्यासाठी मार्ग उपलब्ध होत आहे. शिवाय माल उतरवणे, चढवणे सुलभ होते आणि वेळेचीही बचत होते.
हेही वाचा – अकोल्यात ‘लम्पी’चा प्रादुर्भाव वाढला; आणखी चार जनावरांना लागण
आणखी मालवाहू गाड्या चालवण्यात येणार
मध्य रेल्वेने २७ ऑगस्ट २३ पर्यंत ५७ अधिक लांबीच्या मालवाहू गाड्या चालवल्या आहेत. यामध्ये नागपूर विभागातून ३४ आणि भुसावळ विभागातून २३ जास्त लांबीच्या गाड्यांचा समावेश आहे. असे मध्य रेल्वेचे मुख्य जनसंपर्क अधिकारी शिवराज मानसपुरे म्हणाले.
