अकोला : महावितरणच्या ‘गो-ग्रीन’ योजनेअंतर्गत वीजबिलांसाठी छापील कागदाचा वापर पूर्णपणे बंद करीत केवळ ‘ई-मेल’ व ‘एसएमएस’चा पर्याय उपलब्ध करून दिला. हा पर्याय निवडणाऱ्या अकोला परिमंडळाअंतर्गत अकोला, बुलढाणा आणि वाशीम जिल्ह्यातील पर्यावरणस्नेही १३ हजार ५३९ ग्राहकांकडून १६ लाख २४ हजार ६८० रुपयांची वार्षिक बचत सुरू आहे.
महावितरणच्या ‘गो-ग्रीन’ योजनेनुसार वीज ग्राहकांनी छापील वीजबिलाच्या कागदाऐवजी फक्त ‘ई-मेल’ व ‘एसएमएस’चा पर्याय निवडल्यास प्रतिबिलात १० रुपये सवलत देण्यात येते. त्यामुळे योजनेत सहभागी ग्राहकांची वीजबिलांमध्ये वार्षिक १२० रुपयांची बचत होते.
हेही वाचा – वर्धा : नाराज काँग्रेस जिल्हाध्यक्षांची संमेलनास दांडी, म्हणतात तब्येत बिघडली…
वीजबिल तयार झाल्यानंतर लगेचच संगणकीय प्रणालीद्वारे ते ‘गो-ग्रीन’मधील ग्राहकांना ‘ई-मेल’द्वारे पाठविण्यात येत आहेत. सोबतच ‘एसएमएस’द्वारेदेखील वीजबिलाची माहिती दिली जाते. त्यामुळे ग्राहकांना ‘प्रॉम्प्ट पेमेंट’चा लाभ घेणे अधिक शक्य झाले. ‘गो-ग्रीन’ योजना ही काळाची गरज आहे. वीजग्राहकांनी या योजनेत सहभागी व्हावे व पर्यावरण रक्षणात योगदान द्यावे, असे आवाहन अकोला परिमंडळाच्यावतीने करण्यात आले आहे.
हेही वाचा – नजर हटता हटेना! ..आणि ४५ वर्षांची ‘वनबाला’ नटूनथटून धावू लागली
बुलढाणा जिल्ह्यातून सर्वाधिक सहभाग
अकोला परिमंडळाअंतर्गत अकोला जिल्ह्यात पाच हजार १४५ ग्राहक ‘गो-ग्रीन’ योजनेत सहभागी झाले आहेत. बुलढाणा जिल्ह्यात सहा हजार ०३८ ग्राहक, तसेच वाशीम जिल्ह्यातील दोन हजार ३५६ ग्राहकांनी ‘गो-ग्रीन’मध्ये सहभाग घेतला आहे.