अकोला : अकोल्यातील विद्यमान खासदार सध्या व्हेंटिलेटरवर आहेत. निवडणुकीत त्यांचे व्हेंटिलेटर काढतील, असे वादग्रस्त वक्तव्य काँग्रेस प्रदेशाध्यक्ष नाना पटोले यांनी खासदार संजय धोत्रे यांचे नाव न घेता गुरुवारी येथे केले. त्यानंतर त्यांनी सारवासारव करीत संजय धोत्रे माझे मित्र असल्याचे सांगितले. या वक्तव्यावरून वाद पेटण्याची चिन्हे आहेत.
हेही वाचा : ‘वंचित’च्या पाठिंब्यानंतरही आनंदराज आंबेडकर माघारीवर ठाम; वंचित बहुजन आघाडीच्या पदाधिकाऱ्यांवर केले आरोप
अकोला लोकसभा मतदारसंघातील काँग्रेसचे उमेदवार डॉ. अभय पाटील यांचा उमेदवारी अर्ज दाखल करण्यासाठी नाना पटोले गुरुवारी अकोल्यात आले होते. यावेळी स्वराज्य भवन येथे आयोजित सभेत ते बोलत होते. नाना पटोले म्हणाले, ‘भाजपमध्ये असतांना २०१४ ते २०१७ पर्यंत खासदार होतो. ज्यावेळी जीएसटी आणि नोटाबंदी आली, त्यावेळी नरेंद्र मोदींचा समोरासमोर विरोध केला. त्यावेळी अकोल्याचे विद्यमान खासदार देखील तिथे उपस्थित होते. ते आता व्हेंटिलेटरवर आहेत. व्हेंटिलेटर केव्हा काढतील मला माहिती नाही. पण ते निवडणुकीतच काढतील.’ पुढे बोलतांना नाना पटोलेंनी खासदार संजय धोत्रे मित्र असल्याचेही सांगितले. नाना पटोले यांनी खा. संजय धोत्रे यांच्या प्रकृतीवरून केलेल्या विधानामुळे नवा वाद निर्माण होण्याची शक्यता आहे.
