विषमज्वर आजाराचा उद्रेक वाढता वाढता वाढे; अकोला जिल्ह्यातील रुग्णसंख्येत भर

दूषित पाण्यासह इतरही कारणामुळे पातूर तालुक्यातील चतारी गावामध्ये साथ रोगाने पाय पसरले आहेत. गावात अनेक रुग्ण आढळून येत आहेत. चतारी गावामध्ये विषमज्वर आजाराची साथ निर्माण झाली. गावाची लोकसंख्या दोन हजार ३०० असून चतारीमध्ये ४२६ घरे आहेत. १९८ घरांतील एक हजार १४२ नागरिकांची तपासणी गुरुवारी करण्यात आली. ताप, मळमळ, पोटदुखी, डोकेदुखीचे सहा रुग्ण सर्वेक्षणात आढळून आले आहेत. उपचार केल्याने पाच रुग्णांची प्रकृती सुधारली. चतारी ग्रामीण रुग्णालयात काही रुग्णांवर उपचार सुरू आहेत. रक्त तपासणीमध्ये एक रुग्ण विषमज्वरने बाधित आढळले.

१९ रुग्ण आढळले

गावामध्ये ताप, मळमळ, पोटदुखीचे १९ रुग्ण आढळून आले आहेत. त्यातील १८ रुग्णांची प्रकृती उपचारानंतर सुधारली. एकूण चार पथके चतारी गावात घरोघरी जाऊन सर्वेक्षण करीत आहेत. पिण्याचे पाणी उकळून व आर.ओ. पाण्याचा वापर करण्याचे नागरिकांना आरोग्य शिक्षण दिल जात असल्याची माहिती आरोग्य विभागाने दिली. वैद्यकीय अधिकारी, सामुदाय आरोग्य अधिकारी, आरोग्य सहाय्यक प्रत्येकी एक जण, आरोग्य सेवक चार, आरोग्य सेविका दोन, आशा स्वयंसेविका व अंगणवाडी सेविका पाच असे मनुष्यबळ कार्यरत आहेत. जिल्हाधिकारी, मुख्य कार्यकारी अधिकारी, आरोग्य उपसंचालक, जिल्हा आरोग्य अधिकारी, जिल्हा साथरोग तज्ज्ञ आदींनी चतारी येथे भेट देऊन संबंधित अधिकारी व कर्मचाऱ्यांना साथ नियंत्रणात येण्यासाठी काही सूचना दिल्या आहेत.

ताप, मळमळ, पोटदुखी, डोकेदुखी आदी कोणतेही लक्षणे आढळल्यास त्वरित तपासणी करुन घेण्याचे आवाहन आरोग्य विभागाने केले आहे. दूषित पाणी पुरवठ्यामुळे साथ रोग पसरण्याची शक्यता असते. त्यामुळे पिण्याच्या पाण्याची सुद्धा तपासणी केली जात आहे. तपासणीसाठी पाण्याचे पाच नमुने घेतले. त्याचे अहवाल प्रलंबित आहेत. विषमज्वर आजाराचा उद्रेक नियंत्रणात येण्यासाठी प्रशासनाचे प्रयत्न असून चतारी गावात आरोग्य यंत्रणा सतर्क ठेवण्यात आली आहे.