अमरावती : दहाव्या वर्गात शिकणाऱ्या मुलीच्या हातातील मोबाइल घेऊन वडिलांनी तो खाली आपटला. त्यामुळे मोबाईल फुटला. मोबाईल फोडल्याचा राग मनात धरून दहाव्या वर्गात शिकणारी १५ वर्षीय मुलगी घरातून निघून गेली. या प्रकरणी कुटुंबीयांनी तळेगाव पोलिसांत तक्रार दिली असून पोलिसांनी तिचा शोध सुरू केला आहे.
पंधरा वर्षीय मुलगी सायंकाळी घरीच मोबाईल पाहत होती, त्यावेळी तिच्या भावाने तो मोबाईल मागितला. मात्र, मुलीने काही त्याला मोबाईल दिला नाही. त्यावेळी मुलीचे वडील त्या ठिकाणी आले व त्यांनी मुलीच्या हातातून मोबाईल हिसकला आणि तो जमिनीवर आपटल्‍याने फुटला. मोबाईल फोडल्‍यामुळे मुलीला राग आला व हाच राग मनात धरून ती घरातून बाहेर पडली.
ती बराच वेळ घरी न आल्यामुळे कुटुंबीयांना तीच्या मैत्रिणींकडे तसेच गावात तिचा शोध सुरू केला, मात्र ती काही दिसली नाही. त्यानंतर कुटुंबीयांनी शोधमोहीम सुरूच ठेवली. दरम्यान, बस थांब्‍यावर विचारणा केली असता ती चांदूर रेल्वे मार्गाने पायी गेल्याचे सांगण्यात आले. पोलिसांनी मुलीचा शोध सुरू केला आहे.
