भंडारा जिल्ह्यात तळपत्या उन्हातही मतदारांमध्ये उत्साह….दुपारी १ पर्यंत ३४.५६ टक्के मतदान…

सध्या जिल्ह्यात ४२ अंश सेल्सिअस तापमानाची नोंद करण्यात आल्याने उन्हाची दाहकता लक्षात घेता मतदानाच्या टक्केवारीवर त्याचा परिणाम होण्याची शक्यता आहे. यावेळी मतदानाचा टक्का वाढावा याकरिता प्रशासनाने महिनाभर जनजागृती उपक्रम राबविले होते. त्याचा प्रभाव मतदारांवर दिसत आहे. सकाळी मतदानाची टक्केवारी अपेक्षेपेक्षा फारच कमी होती. मात्र दुपारनंतर त्यात चांगली वाढ झाली. लोकसभा निवडणुकीच्या मतदानासाठी मतदारांमध्ये उत्साह संचारला आहे. मतदार संघात अर्जुनी मोरगाव – ४९.१७, भंडारा – ३१.३८, गोंदिया – ३३.१५, साकोली – ३२.९९, तीरोडा – ३१.६८, तुमसर – ३१. ८६ अशी आतापर्यंत विधानसभा निहाय मतदानाची टक्केवारी आहे. सर्वच मतदान केंद्रांवर मतदानासाठी नागरिकांच्या रांगा लागल्या आहेत. कुठे गर्भवती महिला तर कुठे लहान लहान मुलांना घेऊन महिलांनी भर उन्हात मतदानाचा हक्क बजावला. अनेक ठिकाणी ज्येष्ठ नागरिक आणि दिव्यांगानी सुध्दा उत्साहात मतदान केले.

हेही वाचा…मद्य पिऊन ईव्हीएम चुकीच्या पद्धतीन सील…..निवडणूक कर्तव्यावर असताना उपअभियंत्याचा…..

उन्हाची दाहकता लक्षात घेता प्रशासनाने प्रत्येक केंद्रावर मतदारांसाठी सर्व सोयी केल्या आहेत. मतदान केंद्रावर दिव्यांग व वयोवृध्द नागरिकांची गैरसोय होऊ नये यासाठी व्हिलचेहर तसेच स्वयंसेवकांची नियुक्ती करण्यात आली होती. भंडारा शहरातील लाल बहादूर शास्त्री शाळा हे मतदान केंद्र सर्वात आगळेवेगळे ठरले आहे. जिल्ह्यात सर्वत्र शांततापूर्ण वातावरणात मतदान सुरू आहे. दरम्यान, मोहाडी तालुक्यातील पाहुणी मतदान केंद्रांवर ईव्हीएम बंद पडले असल्याने मतदार मतदान न करता घरी परत जात आहेत.

हेही वाचा…”वस्त्रहरणाच्या वेळी भीष्माचार्य, द्रोणाचार्य जसे चूप बसले तसेच काल संजय राऊत…”.

सर्व उमेदवारांनी बजावला हक्क

भंडारा गोंदिया मतदार संघाचे भाजप उमेदवार सुनील मेंढे, तसेच काँग्रेस उमेदवार डॉ. प्रशांत पडोळे यांनी सपत्नीक मतदान करीत नागरिकांनी मतदानाचा हक्क बाजविण्याचे आवाहन केले. काँग्रेस प्रदेशाध्यक्ष नाना पटोले यांनी देखील त्यांच्या सुकळी या गावी मतदानाचा हक्क बजावला.