बुलढाणा : अवघ्या विशीत त्यांना 'शस्त्रांचा' मोह जडला अन खरीखुरची शस्त्रे मिळणे कठीण, म्हणून त्यांनी हुबेहूब दिसणारी 'शस्त्रे' चोरली… लवकर पकडल्या गेले नाही म्हणून हाती ही 'शस्त्रे' घेऊन ते वळण मार्गावर फिरत होते. नेमकी हीच घोडचूक त्यांना भोवली अन ते पोलिसांच्या जाळ्यात अलगद अडकले. रोशनसिंह टाक (२०) व हीरासिंग मोहनसिंग बावरे (१९) अशी आरोपींची नावे असून ते दोघे देऊळगाव राजा शहरातील रहिवासी आहेत. त्यांच्याकडून देऊळगाव राजा पोलिसांनी ८ एअर रायफल व २२ एअर पिस्टल जप्त केले आहे. देऊळगाव राजा येथील रविंद्र धन्नावत यांच्या पिस्टल विक्रीच्या दुकानातुन १६ ऑक्टोबर २०२३रोजी ८ एअर रायफल व २२ पिस्टल चोरी गेल्याची तक्रार तक्रार देऊळगाव राजा पोलीस ठाण्याला देण्यात आली होती. पोलिसांनी भादवीच्या कलम ४६१, ३८०, ३४ नुसार गुन्हा दाखल केला. हेही वाचा : उपराजधानीत अनैतिक संबंधातून सर्वाधिक हत्याकांड, ६९ पैकी ३४ खूनांमध्ये प्रेमप्रकरण आणि विवाहबाह्य संबंध तपास चक्रे फिरली 'एसडीपीओ' अजयकुमार मालवीय यांच्या मार्गदर्शनात देऊळगाव राजा पोलिसांनी तपास सुरू केला. मात्र लवकर सुगावा लागला नाही. यामुळे चोरटे निर्धास्त झाले . दरम्यान २७ नोव्हेंबर रोजी दोन युवक बायपास वर एअर रायफल व पिस्टल सह फिरत असल्याची माहिती मिळाल्यावर त्यांना अटक करण्यात आली. मंगळवारी त्यांच्याकडून उर्वरित 'शस्त्रे' जप्त करण्यात आली. याची किंमत १ लाख २७ हजार इतकी आहे. पोलीस निरीक्षक संतोष महल्ले, यांचे मार्गदर्शनाखाली पोलीस उपनिरीक्षक भारत चिरडे, दत्ता नरवाडे, रामकिसन गिते, भगवान नागरे, विश्वनाथ काकड, माधव कुटे, गणेश जायभाये, सैयद मुसा, अनिल देशमुख, शितल नांदे, सुभाष मुंढे व विजय दराडे यांनी ही कार्यवाही केली.
