गडचिरोली : प्रशासनासह पोलिसांसमोर आव्हान निर्माण करणाऱ्या मायक्रोस्कोप चोरीप्रकरणात ‘लोकसत्ता’ने केलेल्या पाठपुराव्यानंतर भांडारपाल अशोक पवार याला निलंबित करण्यात आले. मात्र, अद्याप चोर सापडला नसल्याने तपासावर प्रश्न उपस्थित केल्या जात आहे. जिल्हा हिवताप कार्यालयाने एप्रिल महिन्यात मायक्रोस्कोप यंत्रांची खरेदी केली होती. साठा नोंदवहीत याची नोंद घेतली होती. २२ पैकी चार नग आरोग्य संस्थांना वितरित केले होते तर १८ नग भांडार विभागात ठेवले होते. दरम्यान, ऑगस्ट महिन्यात ते चोरीस गेले. ही बाब निदर्शनास आल्यावर गडचिरोली ठाण्यात गुन्हा नोंदविण्यात आला.
हेही वाचा : सोलार कंपनीत स्फोट : ‘आता आम्ही कुणाच्या भरोशावर जगावं?’, आरतीच्या दिव्यांग आईवडिलांचा सवाल
पोलीस अद्याप चोरापर्यंत पोहोचू शकले नाहीत. प्रभारी जिल्हा हिवताप अधिकारी डॉ.पंकज हेमके यांनी या प्रकरणात भांडारपाल अशोक पवार यांच्यावर निष्काळजी व हलगर्जीचा ठपका ठेवत २१ सप्टेंबर २०२३ रोजी कारणे दाखवा नोटीस बजावली. याचा पवार यांनी खुलासाही दिला होता. परंतु आरोग्य विभागातील वरिष्ठ अधिकाऱ्यांच्या खास मर्जीतील असल्याने भांडारपाल पवार यांची पाठराखण केल्या जात होती. ‘लोकसत्ता’ने हे प्रकरण लावून धरल्यानंतर अखेर मुख्य कार्यकारी अधिकारी यांच्या निर्देशानुसार डॉ.हेमके यांनी पवार याला निलंबित केले. परंतु अजूनपर्यंत चोराचा पत्ता लागलेला नाही. विशेष म्हणजे यापूर्वीही त्याच विभागात मायक्रोस्कोप चोरीला गेले होते. त्यामुळे हे यंत्र चोरीला गेले की कागदोपत्रीच दाखविण्यात आले. अशी चर्चा आरोग्य विभाग प्राशासनात आहे.
हेही वाचा : नागपूर: भरधाव कारची झाडाला धडक, दोन ठार
चोरी की बनाव ?
हिवताप विभागातून यापूर्वीही मायक्रोस्कोप चोरी गेले होते. त्यानंतर भांडार शाखेत सुरक्षेबाबत प्रभावी उपाय आवश्यक होते, पण पुन्हा पाच लाखांचे मायक्रोस्कोप चोरीस गेल्याने खळबळ उडाली. चोरीच्या घटनेनंतर सीसीटीव्ही कॅमेरे लावण्यात आले. परंतु आजपर्यंत हे उपाय का केले गेले नाही. असा प्रश्न उपस्थित होतो आहे. दुसरीकडे आरोग्य विभागातील अधिकारी निलंबित भांडारपाल पवार याची पाठराखण करताना दिसतात. ही चोरी आहे की बनाव, असा प्रश्न उपस्थित होतो आहे.
