नागपूर: बलात्काराच्या गुन्ह्यात शिक्षा भोगत असलेल्या एका कैद्याने दुसऱ्या बराकीतील एका युवा कैद्यावर लैंगिक अत्याचार केला. त्या कैद्याने थेट न्यायाधीशांकडे तक्रार केली. या प्रकरणी धंतोली पोलिसांनी आरोपी कैद्याविरुद्ध लैंगिक अत्याचाराचा गुन्हा दाखल करण्यात आला. सचिन ऊर्फ रोहन बहुरीदास (मधुबनी, बिहार) असे आरोपीचे नाव आहे.
आरोपी सचिन याने मुंबईतील अंधेरी भागातील एका महिलेवर बलात्कार केला होता. त्या गुन्ह्यात सचिनला दहा वर्षांची शिक्षा झाली होती. त्याला सध्या नागपूर मध्यवर्ती कारागृहात ठेवण्यात आले होते. त्याची केवळ २ वर्षे शिक्षा बाकी होती. त्याला कैद्यांचा वॉर्डन म्हणून कारागृहातील रुग्णालयात ठेवण्यात आले होते. त्या रुग्णालयात तक्रारदार कैदी शुभा (बदललेले नाव) हा सुद्धा दाखल होता. शुभा हा हत्याकांडाच्या गुन्ह्यात शिक्षा भोगत आहे. मंगळ‌वारी मध्यरात्रीच्या सुमारास आरोपी कैदी सचिनने शुभाला शारीरिक संबंधाची मागणी केली.
हेही वाचा… कौटुंबिक वादातून पतीने केला पत्नीचा खून; उपराजधानीत चोवीस तासांत दोन हत्याकांड
मात्र, त्याने नकार दिला. त्यामुळे सचिनने त्याचा गळ्यावर धारदार वस्तू लावून बळजबरी लैंगिक अत्याचार केला. बुधवारी शुभाची न्यायालयात पेशी होती. त्याने न्यायाधीशांना लैंगिक अत्याचाराच्या घटनेबाबत तक्रार केली. त्यामुळे धंतोलीच्या ठाणेदार प्रभावती एकुरके या मध्यवर्ती कारागृहात गेल्या. त्यांनी चौकशीअंती तक्रार घेऊन गुन्हा दाखल केला. आरोपी कैदी सचिनला ताब्यात घेण्याची प्रक्रिया सुरु आहे.
