नागपूर : दहावीत असलेला १४ वर्षीय एकुलता मुलगा, वडिलाचे त्याच्यावर निस्सीम प्रेम, बापलेक असूनही दोघांची मैत्री, दोघेही नातेवाईकांमध्ये आणि वस्तीतही मित्रासारखे वावरत, मुलासाठी जीव ओवाळून टाकणारा बाप म्हणून ख्याती, दहावीत असलेल्या मुलाला वडिलांनी महागडा शिकवणी वर्ग लावला, मात्र, मुलगा शिकवणी वर्गाला जायला कंटाळा करीत होता, त्याला प्रेमाने धडा शिकवून शिकवणी वर्गाला पाठविण्याची वडिलांची योजना होती, वडिलांनी मुलाशी अबोला धरला, पण बापाचे प्रेम समजून घेण्यात लेक कमी पडला.
वडिलांचा अबोला त्याला सहन झाला नाही, वडिलांचे मन दुखावल्याचे मुलाला अतीव दु:ख, आता वडील आपल्याशी कधीच बोलणार नाहीत, अशी मनात सल, वडिलांचा दुरावा यामुळे मुलाने घरात गळफास घेऊन आत्महत्या करीत जीवन संपवले. वेद रितेश खेळवदकर (१४, रा. लालगंज, झाडे चौक) असे मृत मुलाचे नाव आहे.
हेही वाचा – नागपूर : भरधाव कारची उभ्या ट्रकला धडक; भीषण अपघातात एक ठार, ८ जखमी
पोलिसांनी दिलेल्या माहितीनुसार, वेद हा दहावीचा विद्यार्थी होता. त्याचे वडील खासगी कंपनीत नोकरीवर आहेत. अभ्यासात हुशार असलेल्या वेदसाठी वडिलांनी नुकताच शिकवणी वर्ग लावला होता. मात्र, तो शिकवणी वर्गाला जात नव्हता. वडिलांनी त्याची समजूत घातली. तरीही तो जात नव्हता. वडिलांनी त्याला मारहाण करणे किंवा ओरडण्याऐवजी अबोला धरला. त्याच्याशी वडील तीन दिवसांपासून बोलत नव्हते. त्यामुळे वेदच्या हळव्या मनावर परिणाम झाला. त्याने आईशी बोलून शिकवणी वर्गात न जाण्यासाठी वडिलांची समजूत घालण्याची विनंती केली. मात्र, वडिलांनी त्याला अभ्यास आणि शिकवणी वर्गात गेल्यानंतरच बोलणार, अशी भूमिका घेतली.
वडिलांची नाराजी आणि अबोला वेदला सहन झाला नाही. त्यामुळे वेदने रविवारी दुपारी दीड वाजता घरात ओढनीने गळफास घेऊन आत्महत्या केली. व्यथित झालेल्या वेदला दोन वाजता आईने चहा घेण्यासाठी आवाज दिला. मात्र, खोलीतून प्रतिसाद मिळाला नाही. त्यामुळे आई-वडिलांनी खिडकीतून डोकावून बघितले. वेद गळफास घेतलेल्या अवस्थेत दिसला. आईने मोठ्याने हंबरडा फोडला तर वडील जमीनवर कोसळून बेशुद्ध पडले. अन्य नातेवाईक आणि शेजाऱ्यांनी धाव घेतली. वेदला रुग्णालयात नेले. मात्र, तोपर्यंत वेदचा मृत्यू झाला. या प्रकरणी शांतीनगर पोलिसांनी आकस्मिक मृत्यूची नोंद केली. वेदच्या मृत्यूमुळे परिसरात हळहळ व्यक्त केली जात आहे.
