नागपूर : राष्ट्रीय स्वयंसेवक संघाचा दसरा महोत्सव मंगळवारी सकाळी पारंपारिक पद्धतीने पार पडला. दरवर्षी प्रमाणे यंदाही या कार्यक्रमातील सरसंघचालकांच्या भाषणाची चर्चा झाली, पण सोबतच चर्चा झाली ती कार्यक्रमाला उपस्थित पाहुण्यांची.
या कार्यक्रमाला दरवर्षी नितीन गडकरी देवेंद्र फडणवीस हे भाजप नेते उपस्थित राहतात. सत्तेत असतानाही या नेत्यांनी हा कार्यक्रम चुकवला नाही. यंदाचे वैशिष्ट्य म्हणजे हे दोन्ही नेते अगदी शेजारी बसले होते. प्रसन्न मुद्रेने परस्परांशी चर्चाही करीत होते. दोन व्हीआयपी कार्यक्रमाला उपस्थित असल्याने प्रशासन व पोलीस दलातील वरिष्ठ अधिकारीही येथे हजर होते.
हेही वाचा : नागपूर शहरातील काँग्रेसमधील वादविवादाची परंपरा जुनीच
जिल्हाधिकारी डॉ.विपीन इटनकर यांनी कार्यक्रमस्थळी गडकरी – फडणवीस यांच्याशी संवाद साधतानाचे छायाचित्र चांगलेच चर्चेत आहे. त्याच प्रमाणे या कार्यक्रमाचे प्रमुख पाहुणे व प्रसिद्ध गायक शंकर महादेवन यांनी म्हटलेले श्लोक आणि या कार्यक्रमास आवर्जून उपस्थित राहिलेल्या अभिनेत्री प्राजक्ता माळी यांनीही संघ प्रार्थनेच्या वेळी दाखवलेला पारंपरिक शिस्तबद्धपणा याचीही चर्चा आहे.
