नागपूर : मोदी सरकारने कापड उद्योजकांना कापूस स्वस्त मिळावा म्हणून ११ टक्के आयतकर माफ केल्याने परदेशातून कापूस मोठ्या प्रमाणात भारतात आला, देशातील कापसाचे भाव पडले आणि परिणामी कापूस उत्पादक यवतमाळ जिल्ह्यात ४६० आत्महत्या झाल्या, असा आरोप माजी गृहमंत्री अनिल देशमुख यांनी आज येथे पत्रकार परिषदेत केला.
केंद्र सरकारच्या चुकीच्या आयात निर्यात धोरणामुळे कापसाचे भाव पडले. यामुळे उत्पादन खर्च सुध्दा निघत नाही. दुसरीकडे विविध रोगामुळे सोयाबीनचे उत्पादन जरी घटले असले तरी बाजार योग्य भाव मिळत नाही. शासन मदत जाहीर करते पण ती शेतकऱ्यांच्या खात्यात जमा होत नाही. पिक विमा काढुन सुध्दा तो मिळत नाही. यामुळे शेतकऱ्यावरील कर्जाचा डोंगर वाढत आहे. याच कर्जबाजारीपणामुळे यवतमाळ जिल्हात मोठया प्रमाणात शेतकरी आत्महत्या होत असल्याचा आरोप अनिल देशमुख यांनी केला आहे.
राज्यात कर्जबाजारीपणामुळे शेतकऱ्यांच्या मोठया प्रमाणात आत्महत्या होत आहे. एकटया यवतमाळ जिल्हयाचा विचार केला तर सन २०२२ मध्ये एकुण २७२ शेतकऱ्यांनी आत्महत्या केल्या आहेत. सन २०२३ च्या सप्टेंबर महिन्यापर्यंत तब्बल १८८ शेतकऱ्यांनी आत्महत्या केली आहे. इतक्या मोठया प्रमाणात शेतकरी आत्महत्या होत असतांना राज्यसह केंद्रातील भाजपा सरकार यावर काही बोलण्यास तयार नाही.
